Më 26 gusht, Shqipëria dhe bota kujtuan 116-vjetorin e lindjes së Gonxhe Bojaxhiut, e njohur botërisht si Nënë Tereza — shenjtorja shqiptare që ia kushtoi tërë ekzistencën shërbimit ndaj të varfërve dhe atyre në nevojë. Ndër qytetet që ruajnë lidhje të drejtpërdrejta me figurën e saj madhështore, Shkodra zë një vend të veçantë në histori dhe në zemrat e njerëzve.
Nënë Tereza u largua nga Shkupi në vitin 1928, kur ishte vetëm 18 vjeçe, duke u nisur drejt Dublinit për të ndjekur thirrjen e saj fetare. Pas largimit të saj, familja — nëna Drane dhe motra Age — u shpërngulën nga Shkupi dhe gjetën strehë në Shqipëri. Pikërisht në Lagjen Draçin, një nga lagjet më të lashta të Shkodrës, ndodhet shtëpia ku kjo familje jetoi gjatë viteve 1932–1933, e kthyer sot në muze kujtimor.
Lidhja e thellë me Shkodrën dhe Shqipërinë
Studiuesi Dom Nikë Ukgjini ka hulumtuar me kujdes momentet historike që dokumentojnë lidhjet e Nënë Terezës me trojet shqiptare. Sipas tij, familja Bojaxhiu ishte e njohur si në Maqedoni ashtu edhe në Shqipëri: "Nëna dhe motra kanë jetuar në Tiranë gjatë kohës së komunizmit dhe aty kanë vdekur. Dhe ishte ajo dëshira e saj e zjarrtë që, pas shumë vizitave që ka bërë nëpër botë, të vinte edhe në Shqipëri."
Ky ëndërr u realizua më 15 gusht të vitit 1989, kur Nënë Tereza arriti të vizitonte Shqipërinë për të parë varrin e nënës dhe motrës së saj. Ishte një moment i rrallë dhe shumë i emocionshëm, që vjen pas dhjetëvjeçarësh ndarjeje të detyruar nga regjimi komunist shqiptar.
Kujtesa e gjallë në zemër të qytetit
Prania e Nënë Terezës ndjehet edhe sot në qendër të Shkodrës. Shtatorja e saj qëndron si simbol i përulësisë dhe dashurisë njerëzore, ndërsa sheshi që rrethon atë vend mban emrin "Sheshi Nënë Tereza" — një nderim i merituar që e bën shenjtoren pjesë të pandarë të identitetit qytetar të Shkodrës.
Nënë Tereza, e kanonizuar nga Vatikani në vitin 2016, mbetet figura shqiptare më e njohur në mbarë botën. Lindur në Shkup më 26 gusht 1910 dhe e rritur në traditën kulturore shqiptare, ajo u bë shembull universal i sakrificës dhe dashurisë ndaj njerëzimit. Çdo vit, në ditëlindjen e saj, Shqipëria dhe Kosova e kujtojnë me krenari atë si bijën e tyre — një shqiptare që ndriçoi botën.
BurimiRTSH
