Vetëm 24 orë pasi banesa e tij në fshatin Zallë të Fushë-Krujës u godit nga një shpërthim me lëndë plasëse, i shumëkërkuari Ylli Zalla ra në duart e Policisë së Shtetit. Aksioni policor u zhvillua në Krujë dhe solli fundin e arratisjes së një personi që konsiderohej me rrezikshmëri të lartë shoqërore.
Operacioni "Fundi i Arratisë"
Kapja u realizua nëpërmjet operacionit të koduar "Fundi i Arratisë", ku morrën pjesë forcat speciale RENEA, Drejtoria e Forcës së Posaçme Operacionale, strukturat operacionale të Drejtorisë Vendore të Policisë Tiranë dhe Komisariati i Policisë Krujë. Autoritetet bënë të ditur se Zalla i kishte shmangur prej kohësh strukturat e drejtësisë, duke u konsideruar një ndër personat më të rrezikshëm në kërkim.
Ministri për Punët e Brendshme, Besfort Lamallari, iu drejtua publikisht strukturave të Policisë me fjalë mirënjohjeje. "Përgëzime Policisë së Shtetit për finalizimin me sukses të operacionit policor 'Fundi i Arratisë', për kapjen e një personi shumë të kërkuar dhe me rrezikshmëri të lartë shoqërore", deklaroi Lamallari.
Shpërthimi i natës dhe historia e errët e Zallës
Nata para arrestimit kishte sjellë një ngjarje të rëndë: dera e banesës së Zallës dyshohet se ishte ngarkuar me tritol, i cili shpërtheu dhe shkaktoi dëme të konsiderueshme materiale. Automjeti i tij, i parkuar pranë ndërtesës, u përfshi plotësisht nga flakët dhe u dogj tërësisht. Fatmirësisht, asnjë person nuk u lëndua nga shpërthimi.
Ylli Zalla mbante një dosje të gjatë kriminale. Autoritetet kishin sekuestruar më parë një arsenal armësh në banesën e tij në Fushë-Krujë, ndërsa emri i tij kishte dalë edhe gjatë hetimeve për një atentat mafioz të ndodhur në zonën e Rinasit. Sipas hetuesve, automjeti i përdorur nga autorët e atij atentati dyshohet se kishte dalë nga prona e Zallës, i cili akuzohej gjithashtu se u kishte siguruar armë ekzekutorëve.
Në vitin 2014, Zalla kishte rënë në pranga gjatë një operacioni të lidhur me prodhimin e bombave artizanale. Në atë periudhë, hetuesit e kishin dyshuar gjithashtu për lidhje me rrjete që rekrutonin shqiptarë për të luftuar në Siri, si dhe për kontakte të dyshuara me organizatën terroriste ISIS.
Arrestimi i Zallës vjen në një periudhë kur Policia e Shtetit po intensifikon operacionet kundër personave të shpallur në kërkim dhe figurave të lidhura me krimin e organizuar. Procedimi penal ndaj tij pritet të sqarojë edhe rrethanat e shpërthimit të natës paraardhëse, duke hapur pyetje nëse goditja ishte mesazh nga rivalë të botës kriminale.
BurimiRTSH
