Autoritetet rumune kanë arrestuar shtetasin shqiptar Aurel Hoxhallari, 49 vjeç, i lindur në Tiranë, me qëllim ekstradimin e tij drejt Shqipërisë. Hoxhallari ishte shpallur në kërkim ndërkombëtar pasi Gjykata e Posaçme e Shkallës së Parë për Korrupsionin dhe Krimin e Organizuar i kishte caktuar masën e sigurisë "arrest me burg" për një sërë veprash të rënda penale.
Ndaj tij rëndojnë akuza të shumta: vrasje me paramendim, prodhim dhe mbajtje pa leje e armëve dhe municioneve luftarake, prodhim dhe shitje e lëndëve narkotike, si dhe organizim dhe drejtim i një grupi të strukturuar kriminal.
Organizatori i dyshuar i ekzekutimit të Devi Kasmit
Hoxhallari dyshohet se ka qenë njeriu që planifikoi vrasjen e Devi Kasmit, të kryer më 29 janar 2018 në rrugën "Kongresi i Manastirit" në Tiranë. Sipas hetimeve, ai veproi në bashkëpunim me një shtetas grek dhe persona të tjerë, të organizuar si grup kriminal i strukturuar. Ekzekutori i dyshuar i qitjes ishte shtetasi grek Efthymiou Efthymious, i cili hapi zjarr ndaj Kasmit duke e lënë të vrarë në vend.
Gjatë hetimeve të zhvilluara pas ngjarjes, policia sekuestroi në banesat e personave të dyshuar nëntë armë zjarri, rreth 130 kilogramë kanabis dhe një numër të konsiderueshëm bimësh narkotike — prova që konfirmuan lidhjet e grupit me trafikun e drogës.
Dënimi i përjetshëm dhe procedurat e ekstradimit
Në vitin 2023, Gjykata e Posaçme Kundër Korrupsionit dhe Krimit të Organizuar e dënoi Hoxhallarin me burgim të përjetshëm, duke e gjykuar në mungesë si organizatorin kryesor të vrasjes. Megjithë vendimin gjyqësor, ai kishte mundur të qëndronte i lirë duke u fshehur jashtë vendit.
Pas arrestimit në Rumani, Interpol Tirana ka nisur bashkëpunimin me homologët rumunë dhe spanjollë për të përfunduar procedurat ligjore të ekstradimit. Kthimi i tij në Shqipëri do t'i hapë rrugën drejtësisë shqiptare për ta vënë para vendimit të plotfuqishëm të gjykatës. Rasti i Hoxhallarit është një tjetër shembull i bashkëpunimit ndërkombëtar policor që po jep rezultate konkrete në ndjekjen e të dënuarve që kërkojnë strehë jashtë kufijve të vendit.
BurimiRTSH
