Drejtori i Policisë së Shtetit, Skënder Hita, doli të mërkurën përpara mediave për të paraqitur bilancin zyrtar të ngjarjeve që shoqëruan protestat në Tiranë. Sipas tij, gjatë kësaj periudhe janë arrestuar gjithsej 167 persona, ndërsa 388 të tjerë janë proceduar penalisht. Paralelisht, 7 punonjës policie janë pezulluar nga detyra dhe ndaj tyre ka nisur menjëherë hetimi disiplinor, pasi akuzohen për dhunë ndaj protestuesve.
"Janë arrestuar 167 shtetas dhe janë proceduar 388 të tjerë. Janë pezulluar edhe 7 punonjës policie, ndaj të cilëve ka nisur menjëherë hetimi disiplinor", deklaroi Hita në konferencën për shtyp.
132 efektivë të plagosur, sekuestrohen armë dhe molotovë
Drejtori i Policisë bëri të ditur se gjatë protestave janë dëmtuar institucione publike, prona shtetërore dhe private, ndërkohë që forcat e rendit u ekspozuan ndaj sulmeve të organizuara. Sipas Hitës, në terren u sekuestruan bomba molotov, llastiqe dhe sende të tjera të rrezikshme. Nga dhuna e ushtruar ndaj efektivëve, 132 punonjës policie mbetën të dëmtuar.
Hita theksoi se Policia u ka bërë thirrje të vazhdueshme protestuesve që të distancohen nga grupet e dhunshme, duke sqaruar se ndërhyrjet u realizuan sipas shkallës së përshkallëzimit të situatës dhe në përputhje të plotë me kuadrin ligjor në fuqi.
Garancia për procedurat standarde
"Dua t'i siguroj qytetarët se asnjë punonjës policie nuk ka marrë urdhër për të vepruar në kundërshtim me procedurat standarde. Punonjësit e policisë janë instruktuar vazhdimisht që në çdo rast ndërhyrjeje të zbatojnë të gjitha procedurat", nënvizoi Hita, duke u distancuar nga çdo akuzë për urdhëra të paligjshëm.
Pezullimi i 7 efektivëve tregon se institucioni është i gatshëm të mbajë përgjegjësi edhe brenda radhëve të veta, por njëkohësisht shifra e lartë e të arrestuarve dhe procedimeve penale tregon se autoritetet kanë ndërmarrë masa të rëndësishme juridike ndaj atyre që çuan protestat drejt dhunës. Hapat e ardhshëm do të varen nga ecuria e hetimeve, si ato penale ndaj protestuesve, ashtu edhe ato disiplinore ndaj efektivëve të pezulluar.
BurimiRTSH
