Deklarata provokuese e ministrit të Jashtëm serb, Ivica Dačić, se "një ditë flamuri serb do të valëviset mbi Prizren", ka rikthyer në qendër të vëmendjes ndërkombëtare ambiciet territoriale të Beogradit ndaj Kosovës. Kjo retorikë ka nxitur reagime të ashpra nga analistë dhe politikanë evropianë, duke e vënë sërish në provë durimin e komunitetit ndërkombëtar ndaj pretendimeve serbe.
Ish-ministri gjerman për Çështjet Evropiane, Michael Roth, u shpreh i ashpër ndaj kësaj politike, duke e cilësuar si të rrezikshme për stabilitetin e rajonit dhe duke propozuar pezullimin e fondeve të Bashkimit Evropian për Serbinë. Sipas tij, tolerimi i një retorike të tillë mund të çojë në pasoja të rënda dhe destabilizuese për gjithë Ballkanin Perëndimor.
Profesori Halili: "Këto nuk janë fjalë të rastit"
Profesori Nijazi Halili, duke komentuar situatën, ka nënvizuar se deklaratat e Dačić-it nuk janë gabime diplomatike spontane, por mesazhe të qëllimshme nacionaliste që vënë në pikëpyetje sovranitetin dhe integritetin territorial të Kosovës. Ai thekson se Brukseli nuk mund të mjaftohet me shprehjen e shqetësimit, por duhet të kalojë në veprime konkrete. "Deklarata e Ivica Dačić-it se flamuri serb do të valëviset mbi Prizren është dëshmi e një diskursi politik që vazhdon të sfidojë sovranitetin e Kosovës. Nuk janë pohime të pafajshme — janë mesazhe nacionaliste që ushqejnë pretendimet territoriale dhe rrezikojnë stabilitetin rajonal," ka theksuar profesori Halili.
Sa i përket paralajmërimit të Roth-it se një politikë e tillë mund të përfundojë me luftë, Halili e merr seriozisht këtë vlerësim, megjithëse sqaron se kjo nuk do të thotë se konflikti është i pashmangshëm. Rreziku real, sipas tij, qëndron pikërisht në vazhdimin e tolerimit të fjalëve kërcënuese pa ndonjë pasojë të prekshme. "Paralajmërimi i Michael Roth-it duhet marrë seriozisht. Retorika kërcënuese, kur tolerohet dhe nuk shoqërohet me pasoja, krijon terrein për veprime destabilizuese. Paqja nuk mund të garantohet duke mbyllur sytë para deklaratave që vënë në dyshim kufijtë dhe sovranitetin e një shteti," ka deklaruar ai.
Thirrje për kushtëzim të fondeve dhe llogaridhënie ndaj Serbisë
Profesori kërkon nga Bashkimi Evropian të kalojë nga retorika e shqetësimit në një politikë të vërtetë kushtëzimi dhe llogaridhënieje. Sipas tij, BE-ja duhet të shqyrtojë seriozisht lidhjen e fondeve evropiane dhe benefiteve të procesit të integrimit me sjelljen e Beogradit. "Nëse Serbia vazhdon me një retorikë të tillë, BE-ja duhet të konsiderojë masa konkrete, duke përfshirë kushtëzimin e fondeve dhe përfitimeve të procesit të integrimit. Nuk mund të kërkohet nga Kosova që të tregojë vazhdimisht angazhim ndaj dialogut, ndërkohë që deklaratat destabilizuese nga Beogradi kalojnë pa pasoja të krahasueshme," ka vlerësuar Halili.
Profesori insiston se qasja e BE-së duhet të jetë e barabartë për të gjitha palët dhe se Serbia nuk mund të vijojë të gëzojë privilegjet e integrimit pa treguar angazhim të vërtetë ndaj marrëdhënieve të fqinjësisë së mirë dhe normalizimit të raporteve me Kosovën. Ai përmbyll duke theksuar se Kosova është shtet sovran dhe i pavarur, dhe se paqja e qëndrueshme në rajon kërkon një qëndrim të palëkundur të bashkësisë ndërkombëtare ndaj çdo pretendimi territorial. "Kosova nuk është objekt i ambicieve territoriale të askujt, por një shtet sovran dhe i pavarur. Stabiliteti afatgjatë kërkon që Bashkimi Evropian të jetë i vendosur dhe konsistent në mbrojtjen e këtyre parimeve," ka përfunduar profesori Halili.
BurimiAlbeu
