Ermal Beqiri, 44-vjeçari i shpallur në kërkim ndërkombëtar nga Prokuroria e Posaçme kundër Korrupsionit dhe Krimit të Organizuar (SPAK) në kuadër të aferës së Agjencisë Kombëtare të Shoqërisë së Informacionit (AKSHI), ka rënë në duart e autoriteteve franceze pas një operacioni të papritur. Ngjarja nisi kur Forcat Ajrore dhe të Hapësirës së Francës vëzhguan një avion të lehtë që fluturonte në lartësi të ulët mbi centralin bërthamor të Penly, duke aktivizuar procedurat e sigurisë.
Avioni u shoqërua nga autoritetet drejt aeroportit Albert, ku piloti u ndalua për verifikime të menjëhershme. Gjatë kontrollit, në avion u gjetën tre pajisje elektronike të tipit Airtag, të njohura si mjete gjurmimi të objekteve, rrethanë që shtoi dyshimet e autoriteteve franceze ndaj tij. Pas identifikimit, u konfirmua se bëhej fjalë për Beqirin, person i shënuar në listën e kërkimeve ndërkombëtare.
Shpjegimi i Beqirit dhe procedurat e ekstradimit
Gjatë marrjes në pyetje, Beqiri pretendoi se ulja e papritur e lartësisë mbi centralin bërthamor nuk kishte qenë e qëllimshme, duke thënë se në atë çast po fliste në telefon me nënën e tij. Shpjegimet e tij nuk e bindën hetuesit, të cilët vendosën të kontaktojnë autoritetet shqiptare. Policia e Shtetit ka bërë të ditur se Beqiri ndodhet tashmë në paraburgim dhe pritet të dalë para Gjykatës Penale të qytetit Amiens, ku do t'i bëhet e ditur zyrtarisht urdhri i kërkimit ndërkombëtar dhe do të nisin procedurat për ekstradimin e tij drejt Shqipërisë.
Beqiri akuzohet nga drejtësia shqiptare për një sërë veprash penale me peshë: heqje e paligjshme e lirisë, konkurrencë e paligjshme me dhunë, shkelje e barazisë në tenderat publikë, krijim i grupit të strukturuar kriminal dhe pastrim i produkteve të veprës penale. Hetuesit dyshojnë se ai, në bashkëpunim me Ergys Agasin, ndërtoi një rrjet kriminal brenda AKSHI-t, duke ushtruar presion sistematik ndaj biznesmenëve për t'i detyruar të tërhiqeshin nga garat e tenderëve. Kompanitë e lidhura me Beqirin dyshohet se përfituan kontrata me vlera prej miliona eurosh.
Hetimi i gjerë brenda AKSHI-t
Çështja penale ka në fokusin e saj edhe figura të tjera institucionale. Ish-drejtoresha e AKSHI-t, Mirlinda Karçanaj, ish-zëvendësdrejtoresha Hava Delibashi, si dhe disa biznesmenë e zyrtarë policie janë nën hetim për të njëjtën dosje. Arrestimi i Beqirit në Francë konsiderohet një zhvillim kyç që mund të përshpejtojë ecurinë e procesit gjyqësor. Tani procedurat ligjore ndërkombëtare do të përcaktojnë nëse dhe kur ai do të kthehet në Shqipëri për t'u përballur me drejtësinë.
BurimiFax News
