Drejtori i Përgjithshëm i Policisë së Shtetit, Skënder Hita, doli të enjten para medias me një deklaratë të ashpër, duke hedhur akuza të drejtpërdrejta ndaj organizatorëve të protestave të dhunshme që kanë shkundur Tiranën prej rreth 72 orësh. Sipas tij, prapa veprimeve të dhunshme — sulmeve ndaj institucioneve, zjarrvënieje dhe plaçkitjeve — nuk qëndrojnë studentë, por persona të rekrutuar posaçërisht për të destabilizuar rendin publik.
71 efektivë të plagosur, disa rëndë
Hita bëri publike një bilanc të rëndë: gjatë trazirave të tri ditëve të fundit, 71 punonjës të Policisë së Shtetit kanë pësuar lëndime gjatë ushtrimit të detyrës, disa prej tyre me dëmtime serioze. "Prej gati 72 orësh, kryeqyteti po përballet me një valë dhune, sulmesh, zjarrvëniesh dhe shkatërrimesh ndaj institucioneve shtetërore, pronës publike dhe private, duke vënë në rrezik jetën dhe sigurinë e qytetarëve", deklaroi ai.
Drejtori i policisë theksoi se e drejta kushtetuese e protestës është e garantuar dhe e paprekshme, por nuk mund të shërbejë si mjet justifikimi për dhunë, grabitje apo dëmtim prone. "Policia e Shtetit nuk është pronë e asnjë partie politike. Ajo është institucion i Republikës, në shërbim të ligjit dhe qytetarëve", u shpreh Hita.
"Asnjë nga të ndaluarit e natës së parë nuk rezultoi student"
Pjesa më e goditshme e konferencës ishte kur Hita prezantoi të dhëna konkrete lidhur me identitetin e personave të ndaluar. Sipas tij, nga gjithë ata që u arrestuan gjatë natës së parë të trazirave, asnjë nuk rezultoi të ishte student. Edhe gjatë natës së dytë — të shënuar nga veprime masive zjarrvënieje dhe plaçkitjesh — numri i studentëve mes të ndaluarve ishte "shumë i vogël". "Pas maskave që udhëheqin protestën me shembullin e dhunës, nuk janë studentë, por individë të rekrutuar për qëllimet e errëta të organizatorëve të vërtetë të kësaj proteste, brenda dhe jashtë vendit", deklaroi kreu i policisë.
Hita iu drejtua gjithashtu prindërve, mësuesve dhe pedagogëve, duke i bërë thirrje të pengojnë përfshirjen e të rinjve në akte dhune të organizuar. "Të rinjtë kanë të drejtë të protestojnë, të kërkojnë dhe të kundërshtojnë, por askush nuk duhet t'i përdorë si mburojë për të sulmuar institucionet", tha ai.
Lidhur me përdorimin e gazit lotsjellës në zonat urbane, Hita e mbrojti këtë zgjedhje taktike, duke argumentuar se intensiteti i breshërisë me gurë e bëri të pamundur çdo lloj ndërhyrjeje tjetër. Drejtori i policisë u garantoi efektivëve mbështetje të plotë institucionale, duke paralajmëruar se çdo person i përfshirë në dhunë do të identifikohet dhe do të përballet me ligjin. "Mos e ngatërroni vetëpërmbajtjen e Policisë së Shtetit me dobësinë. Policia nuk tërhiqet përballë dhunës", përfundoi Hita.
BurimiRTSH
