Policia e Vlorës ka sqaruar zyrtarisht incidentin e rëndë që tronditi zonat bregdetare të jugut të vendit më 3 shtator. Gjatë një konference shtypi, drejtori i Drejtorisë Vendore të Policisë Vlorë, Edvin Ndreu, bëri publike të gjitha detajet e operacionit dhe rezultatet e tij: pesë persona u kapën në flagrancë, ndërsa gjashtë të tjerë mbeten ende të lirë dhe po kërkohën nga autoritetet.
Si nisi ngjarja dhe si reagoi policia
Gjithçka nisi rreth orës 11:30, kur pronari i një hoteli në Radhimë, shtetasi Vasil Bedinaj, njoftoi policinë se disa persona kishin hyrë me forcë në pronën e tij, e kishin dhunuar fizikisht dhe kërcënuar me armë zjarri. Menjëherë pas njoftimit, policia organizoi shërbime emergjente, ngriti pika kontrolli në të gjitha hyrje-daljet e Vlorës dhe të Dhërmiut, si dhe bashkëpunoi me drejtoritë vendore të Gjirokastrës dhe Fierit për të bllokuar rrugët e arratisjes.
Rreth orës 12:00, një automjet "Range Rover" nuk iu bind urdhrit të policisë për të ndaluar dhe u përplas me barrierat e ngritura në fshatin Peshkëpi. Brenda mjetit ndodheshin Luan Muça dhe vëllezërit Klaudio e Mandrit Lleshaj. Dy prej tyre pësuan dëmtime dhe u dërguan në spital, jashtë rrezikut për jetën. Gjatë kontrollit të automjetit, policia sekuestroi një pistoletë me 16 fishekë luftarakë.
Pak më vonë, në autostradën e Fierit u ndal një mjet tjetër i shpallur në kërkim, i drejtuar nga shtetasi kosovar Blerim Heta. Brenda tij u gjetën fishekë pistolete dhe gjurmë të qarta të goditjeve nga armë zjarri. Gjithashtu, në bypass-in e Vlorës u zbulua i djegur një automjet tip "Audi A8", i dyshuar si mjet i përdorur nga autorët gjatë ngjarjes.
Gjoba e 5 milionë eurove dhe personat e arrestuar
Hetimet e kryera nga grupi i posaçëm hetimor, nën drejtimin e Prokurorisë së Vlorës, nxorën në dritë motivin e ngjarjes. Sipas drejtorit Ndreu, Luan Muça, së bashku me persona të tjerë, kishte shkuar në hotelin e Vasil Bedinajt me qëllim të qartë: nën presionin e armëve dhe dhunës fizike, i kishin vendosur një gjobë prej 5 milionë eurosh dhe e kishin detyruar të largohej nga Shqipëria brenda 48 orësh.
Në përfundim të operacionit, policia arrestoi në flagrancë pesë persona: Luan Muça, 55 vjeç, banues në Tiranë; Klaudio Lleshaj, 29 vjeç, banues në Tiranë; Mandrit Lleshaj, 33 vjeç, banues në Tiranë; Blerim Heta, 40 vjeç, shtetas kosovar; dhe Angjelo Breshani, 29 vjeç, banues në Vlorë. Gjithashtu, u sekuestruan armë dhe disa automjete të lidhura me ngjarjen.
Gjashtë persona të tjerë janë shpallur në kërkim, si dhe katër automjete të dyshuar si të përfshira në incident. Drejtori Ndreu theksoi se puna intensive për kapjen e tyre po vijon pa ndërprerje. Ngjarja hedh dritë mbi tensionet e rënda mes grupeve të biznesit në jug të vendit, ku konfliktet po marrin forma gjithnjë e më të dhunshme dhe me shuma të frikshme financiare në lojë.
BurimiRTSH
