Punonjësit e Policisë së Shtetit, Gardës së Republikës dhe Agjencisë së Mbikëqyrjes Policore kanë mundësinë të blejnë banesën e parë nëpërmjet një kredie bankare pa asnjë interes. Ministri i Punëve të Brendshme, Besfort Lamallari, ka bërë thirrje publike për të gjithë të kualifikuarit që të mos e lënë të kalojë ky afat, duke theksuar se aplikimet mbyllen më 25 shtator 2025.
Programi qeveritar u hap zyrtarisht më 27 gusht nga Ministria e Ekonomisë, Kulturës dhe Inovacionit dhe u drejtohet punonjësve të sektorit publik dhe strukturave të sigurisë. Synimi i deklaruar është lehtësimi i aksesit në strehim për familjet e reja që u shërbejnë institucioneve të shtetit.
300 kuota për administratën dhe forcat e sigurisë
Programi parashikon gjithsej 300 kuota të shpërndara ndërmjet pesë ministrive. Ministria e Punëve të Brendshme, ajo e Mbrojtjes, e Shëndetësisë dhe Mbrojtjes Sociale dhe e Arsimit dhe Sportit marrin nga 70 kuota secila, ndërsa Policia e Burgjeve, nën varësinë e Ministrisë së Drejtësisë, do të përfitojë 20 kuota. Kjo strukturë e shpërndarjes synon të mbulojë sa më gjerë radhët e punonjësve të shtetit me nevojë për strehim.
Lamallari e ilustroi programin me shembullin e Xhestinës, një punonjëse e Policisë së Shtetit që ka siguruar tashmë banesën e saj të parë falë kësaj skeme. "Nëse i shërbeni sigurisë së vendit dhe qytetarëve, mundi dhe sakrifica juaj dhe e familjes tuaj, shpërblehet!", deklaroi ministri, duke nënvizuar se mbështetja synon të njohë kontributin e uniformave të kaltëra dhe familjeve të tyre.
Thirrja e përfitueses: "Aplikoni edhe ju"
Xhestina, e cila do të vijojë jetën me fëmijët e saj në banesën e re, ka shprehur mirënjohje për mundësinë e ofruar dhe i ka bërë thirrje kolegëve, sidomos familjeve të reja brenda forcës policore, të shfrytëzojnë kushtet lehtësuese të programit duke aplikuar sa është ende e mundur.
Ky program vjen në një kohë kur çmimet e banesave në qytetet kryesore shqiptare kanë shënuar rritje të ndjeshme gjatë viteve të fundit, duke e vështirësuar aksesin në pronë për familjet me të ardhura nga sektori publik. Afati i mbylljes së aplikimeve, 25 shtatori, lë vetëm disa ditë në dispozicion për ata që ende nuk kanë ndërmarrë hapat e nevojshëm.
BurimiRTSH
