Ermal Beqiraj, biznesmeni shqiptar i shpallur në kërkim nga Prokuroria e Posaçme Anti-Korrupsion dhe Krimit të Organizuar (SPAK) në kuadër të dosjes së AKSHI-t, është arrestuar të shtunën pasdite në Francë — në rrethana që kanë alarmuar menjëherë autoritetet franceze. Ai po pilotonte një avion të vogël kur u zbulua se kishte fluturuar mbi termocentralin bërthamor Penly, në rajonin Seine-Maritime, duke shkelur zonën e mbrojtur ajrore mbi një nga objektet më të ndjeshme të infrastrukturës energjetike franceze.
Fluturim mbi reaktorin bërthamor dhe AirTag të fshehura në rroba
Sipas autoriteteve franceze, Beqiraj ndodhej në lartësinë rreth 1.200 metra kur uli papritmas hundën e avionit nën kufirin ligjor të lejuar mbi zona të ndjeshme. Termocentrali Penly është jo vetëm një nga qendrat kryesore bërthamore të Francës, por edhe vendi ku po ndërtohen dy reaktorë të gjeneratës EPR-2 — projekt me interes global. Forcat Ajrore dhe Hapësinore Franceze ndërhynë menjëherë, duke dërguar një avion shoqërues që e detyroi Beqirajn të zbresë në aeroportin e Albertit, në rajonin Somme. Sapo preku tokën, ai u arrestua dhe u dërgua në paraburgim.
Gjatë kontrollit trupor, oficerët zbuluan diçka të pazakontë: tre gjurmues të vegjël GPS të markës Apple — të njohura si AirTag — të fshehura mes rrobave të tij. Ky detail ka drejtuar hetimin drejt hipotezës se Beqiraj mund të mos ketë vepruar vetëm, por me porosi nga dikush tjetër. Shpjegimet që ai dha para hetuesve nuk ishin bindëse: pretendoi se kishte bërë një gabim me lartësinë dhe se gjatë fluturimit mbi termocentral kishte qenë në bisedë telefonike me nënën e tij. Edhe itinerari i fluturimit ngjalli dyshime — duke nisur nga Alberti, pilotoi drejt veriut, kaloi Calais-në, vazhdoi nëpër Bretanjë dhe mbërriti mbi Penly.
Kërkim ndërkombëtar, ekstradim dhe pasuri të sekuestruara
Beqiraj mund të kishte shmangur pasojat e rënda nëse verifikimi i emrit të tij nuk do të kishte zbuluar se ndodhej në listën e kërkuarve ndërkombëtarë. Autoritetet franceze i shqiptuan një dënim me kusht dhe gjobë prej 7.000 eurosh për fluturimin e paligjshëm mbi termocentral, pastaj e dorëzuan pranë Zyrës Qendrore për Luftimin e Krimit të Organizuar. Pritet që ai të ekstradohet së shpejti në Shqipëri.
Në Shqipëri, Beqirajt i janë sekuestruar mbi dhjetë pasuri dhe të gjitha llogaritë bankare. Ndër to: truall në resortin "Green Coast" dhe vila luksoze në "Rolling Hills" në Tiranë, apartament në Golem, jahti luksoz "Skyfall" me vlerë rreth 1 milion euro — i regjistruar në emër të një punonjëseje të kompanisë së tij — si dhe dy kompani tregëtare, automjete dhe motomjete.
Beqiraj, bashkëpunëtor i afërt i Ergys Agasit, dyshohet se ka fituar tendera publike me dhjetëra miliona euro nëpërmjet kërcënimeve ndaj kompanive konkurrente. SPAK e akuzon për vepra penale që përfshijnë konkurrencë të paligjshme me dhunë, heqje të paligjshme të lirisë, shkelje të barazisë në tendera, kryerje veprash penale në kuadër të grupit të strukturuar kriminal, pastrim parash dhe korrupsion. Extradimi i tij do të jetë një test i rëndësishëm për bashkëpunimin gjyqësor shqiptaro-francez, por edhe një moment i ri për SPAK-un në ndjekjen e të shpallurve në kërkim jashtë kufijve.
BurimiOpinion.al
