Prokuroria Speciale e Kosovës ka vendosur të pushojë hetimet ndaj Liburn Aliut, ish-ministrit të Mjedisit, Planifikimit Hapësinor dhe Infrastrukturës. Vendimi u mor më 11 shtator, ndërsa Aliu u njoftua nga avokati i tij në mëngjesin e 2 tetorit. Lajmin e bëri publik vetë ish-ministri nëpërmjet rrjeteve sociale.
Procesi hetimor kishte nisur rreth dy vjet më parë dhe kishte përfshirë jo vetëm veprimtarinë e tij si ministër, por edhe pasurinë e tij personale dhe të familjes. Sipas Aliut, të hyrat e tij ishin të deklaruara vazhdimisht që nga fillimi i vitit 2011.
Dy vite nën hetime dhe sulme publike
Gjatë periudhës së hetimeve, ish-ministri thotë se u përball me valë të forta akuzash dhe sulmesh publike. "Nga fillimi i hetimeve jam sulmuar nga të gjitha drejtimet me shpifje dhe ofendime nga më të rëndat, të cilat më janë drejtuar mua, familjes time dhe idealit kombëtar", deklaroi ai. Megjithatë, Aliu theksoi se kishte zgjedhur qëllimisht të mos reagonte publikisht ndaj atyre sulmeve.
Ish-ministri u shpreh se e kishte mirëpritur procesin hetimor që në fillim, duke e parë atë si mundësi për të vërtetuar pastërtinë e tij. "Përballë një mali me shpifje, unë zgjodha të hesht dhe mirëprita hetimin, ashtu siç sot e mirëpres këtë vendim për pushimin e hetimeve, edhe pse për mua ka qenë gjithmonë i pritshëm", shkroi ai.
Gatishmëri për sfida të reja
Megjithëse hetimet u mbyllën, Aliu paralajmëroi se kritika publike mund të vazhdojë. Ai u shpreh i gatshëm t'i ballafaqohet çdo akuze të ardhshme me të vërtetën. "Në botën në të cilën lajmi i rremë përhapet me lehtësi, unë jam i gatshëm që të përballem me të vërtetën", shkroi ish-ministri.
Në fund të postimit të tij, Aliu falënderoi të gjithë ata që i qëndruan besnikë gjatë dy viteve të vështira të procesit hetimor. Mbyllja e hetimeve nga Prokuroria Speciale e vendos ish-ministrin jashtë çdo dyshimi zyrtar penal, duke i hapur rrugën për t'u kthyer aktiv në skenën publike kosovare.
BurimiTelegrafi
