Këshilli i Ministrave ka miratuar një paketë ndryshimesh në ligjin për administrimin e ndërtimeve të konfiskuara si objekte pa leje dhe ia ka dërguar Kuvendit të Republikës për shqyrtim. Nisma, e propozuar nga Ministria e Punëve të Brendshme dhe Ministria e Ekonomisë dhe Inovacionit, synon të riorganizojë nga themeli mënyrën e trajtimit të këtyre pronave, duke vënë në qendër mbrojtjen e qytetarëve që kanë blerë apo porositur njësi banimi e biznesi duke mos qenë në dijeni të shkeljes ligjore nga ndërtuesit.
Ndryshimi më i rëndësishëm institucional është transferimi i kompetencave kryesore operacionale te Agjencia e Administrimit të Pasurive të Sekuestruara dhe të Konfiskuara, e njohur si AAPSK. Kjo agjenci do të veprojë tanimaj si përfaqësuese e shtetit pronar pranë Kadastrës dhe Agjencisë së Zhvillimit të Territorit, duke drejtuar grupe të posaçme pune për finalizimin, përshtatjen dhe shfrytëzimin e ndërtimeve të konfiskuara.
Legalizimi i banesave dhe fondi i dedikuar
Një nga pikat më konkrete të projektligjit ka të bëjë me qytetarët që kanë lidhur kontrata noteriale me investitorë të cilët më pas janë gjetur të shkelën ligjet e ndërtimit. Drafti parashikon se këto njësi individuale do të legalizohen dhe regjistrohen sipas legjislacionit në fuqi, me kusht që kontratat të jenë hartuar tek noteri përpara se të konstatohej shkelja. AAPSK do t'i kërkojë zyrtarisht Kadastrës vijimin e procedurave të legalizimit për çdo rast të tillë.
Për ndërtuesit që kanë tejkaluar lejen e ndërtimit me mbi 10 për qind, projektligji përcakton masa të forta financiare: nëse subjekti zhvillues nuk kryen pagesat e detyruara, do të bllokohen llogaritë bankare dhe asetet e tij. Krahas kësaj, krijohet një fond i posaçëm financiar pranë AAPSK-së, i cili do të ushqehet nga të ardhurat e shitjes ose dhënies me qira të pronave të konfiskuara, nga financimet vendase e të huaja, si dhe nga buxheti i shtetit.
Ankand publik, leje të përshpejtuara dhe e drejta e parablerjes
Projektligji vendos rregulla strikte edhe për procedurat e shitjes së pasurive të konfiskuara. Çmimi i shitjes nuk mund të jetë asnjëherë më i ulët se vlera fillestare e ankandit publik, ndërsa zhvilluesit dhe zbatuesit e pronave të konfiskuara përjashtohen kategorikisht nga pjesëmarrja në këto procedura. Për të nxitur rehabilitimin e shpejtë të objekteve, AAPSK përjashtohet nga tarifat e aplikimit për leje ndërtimi dhe certifikata përdorimi, kurse Agjencia e Zhvillimit të Territorit detyrohet të miratojë lejet e reja brenda 90 ditëve nga data e depozitimit të kërkesës.
Projektligji u njeh gjithashtu të drejtën e parablerjes subjekteve poseduese që do të deklarojnë vullnetarisht objektet e ndërtuara pa leje pranë autoriteteve kompetente brenda gjashtë muajve nga hyrja e ligjit në fuqi. Të gjitha dosjet dhe fondet ekzistuese pranë Ministrisë së Ekonomisë dhe Inovacionit do t'i kalojnë AAPSK-së brenda 30 ditëve. Ligji parashikohet të hyjë në fuqi 15 ditë pas botimit në Fletoren Zyrtare, duke hapur kështu një fazë të re në trajtimin e problemit të ndërtimeve informale në vend.
BurimiRTSH
