Kryeministri Edi Rama doli publikisht për të ndarë disa nga të dhënat që, sipas tij, autoritetet shqiptare kanë grumbulluar lidhur me episodet e dhunës gjatë protestave të javëve të fundit. Duke bërë një dallim të qartë midis protestës fillestare me flamingo — të cilën e cilësoi si paqësore dhe me arsye legjitime — dhe valës së dytë të dhunshme, Rama pretendoi se kjo e fundit nuk ishte spontane, por e orkestruar me kujdes.
Akuza ndaj Antifas dhe financimeve të huaja
Kryeministri deklaroi se Policia e Shtetit disponon të dhëna konkrete për futjen e maskave dhe lëndëve shpërthyese në territorin shqiptar, si dhe për organizimin e grupeve brenda rrjetit të njohur si "Antifa". Sipas Ramës, ky rrjet vepron nën ideologji antikapitaliste dhe anarkiste dhe ka synuar destabilizimin e rendit publik përmes dhunës. "Këta nuk janë studentët", tha Rama, duke theksuar se të ndaluarit nuk kanë asnjë lidhje me lëvizjen studentore paqësore.
Kryeministri akuzoi gjithashtu burime të huaja financimi si faktor i rëndësishëm pas organizimit të dhunës, duke nënkuptuar ndër të tjera edhe mundësi lidhje me Iranin — akuzë që e paraqiti si pjesë e hetimeve në vazhdim. Drejtim i veçantë akuzash u bë edhe ndaj Partisë Demokratike, të cilën Rama e ngarkon me bashkëpërgjegjësi për inicimin e incidenteve të dhunshme.
Lista me 45 të ndaluar dhe paralajmërimi për zbulime të tjera
Gjatë deklaratës, Rama publikoi një listë me 45 persona të ndaluar nga policia, duke pretenduar se një pjesë e tyre kanë precedentë penalë të lidhur me narkotikët, vjedhjet, dhunën dhe kundërshtimin e forcave të rendit. Identiteti i plotë i personave, tha ai, mbrohet për arsye ligjore, por çështjet e tyre janë tanimë në duart e drejtësisë.
Kryeministri solli si argument edhe bilancin e të lënduarve, duke pretenduar se numri i policëve të plagosur ishte më shumë se dyfishi i qytetarëve të dëmtuar — shifër që, sipas tij, dëshmon karakterin e planifikuar dhe agresiv të dhunës. "Nuk bën vaki që në një manifestim, pjesa më e dëmtuar të jetë policia", u shpreh Rama.
Kryeministri kritikoi edhe disa media televizive, të cilat sipas tij glorifikuan dhunën dhe përmbysën realitetin duke paraqitur policinë si agresor. "Për ekranet e korruptuara do të ketë një kohë të dytë për të folur", paralajmëroi ai.
Në mbyllje, Rama ripohoi të drejtën e protestës si vlerë demokratike të padiskutueshme, por tërhoqi vijën ndarëse ndaj dhunës: "Dhuna nuk është ide. Dhuna është krim. Dhuna është armik i demokracisë, është armik i lirisë". Ai paralajmëroi se identiteti dhe roli i të gjithë personave të përfshirë në organizimin e dhunës do të bëhen publike gradualisht: "Askush nuk do të mbetet pa u ekspozuar."
BurimiRTSH
