Kryeministri Edi Rama thirri të enjten një mbledhje të përbashkët me ministrat e qeverisë dhe deputetët e grupit parlamentar të Partisë Socialiste, ku vuri në qendër të diskutimit nevojën për të sheshuar distancën që ka akumuluar shteti shqiptar ndaj qytetarëve. Takimi u mbajt në kuadër të hapjes së një sezoni të ri politik, ku PS synon të rivendosë besimin e votuesve me masa konkrete, jo vetëm me platforma komunikimi.
Rama iu referua disa iniciativave të reja të qeverisë — "Prania Besnike", "BESA", "Pasqyrë Albania" dhe "Shkalla e Meritës" — duke qartësuar se ato nuk duhet të lexohen si mjete propagandistike, por si hapa të një rishikimi më të gjerë institucional. Megjithatë, kryeministri pranoi hapur se asnjë aplikacion apo fushatë komunikimi nuk mjafton vetëm: "Shqiptarët nuk kanë nevojë për një aplikacion tjetër që i shtohet xhunglës digjitale. Hendeku real mes nesh dhe njerëzve nuk mbushet me thjesht dhe vetëm një fushatë komunikimi", tha ai.
Tri "plagë" që ushqejnë njëra-tjetrën
Rama cilësoi si shqetësim kryesor ekzistencën e tre dobësive strukturore që, sipas tij, ndërthurin njëra-tjetrën dhe pengojnë funksionimin normal të shtetit. E para është fenomeni i "shtetit labirint" — një sistem ku qytetari nuk di kush mban përgjegjësi dhe kur do të zgjidhet çështja e tij. Mungesa e orientimit institucional, sipas kryeministrit, krijon frustrim dhe largim nga institucionet.
BurimiRTSH
