Ministria e Mbrojtjes ka publikuar bilancin e fundit të situatës së zjarreve në vend: gjatë 24 orëve të fundit janë shënuar 44 vatra në të gjithë territorin, nga të cilat 14 vijojnë aktive, 9 janë nën mbikëqyrje dhe 21 janë shuar plotësisht. Situata mbetet veçanërisht e vështirë në qarqet e Shkodrës dhe Tiranës, ku operacionet po zhvillohen edhe nga ajri.
Në total, në vijën e parë të zjarrit janë angazhuar 636 forca vendore dhe 67 automjete zjarrfikëse. Krahas tyre, Forcat e Armatosura kanë vendosur 329 efektivë, kanë kryer 6 operacione me helikopterë dhe kanë përdorur një avion tip Air Tractor si dhe një dron për monitorim dhe ndërhyrje.
Shkodra dhe Tirana në fokus
Në qarkun e Shkodrës, vatra në zonën Bardhaj–Myselim mbetet ndër më serioset. Aty operojnë 71 efektivë të Forcave të Armatosura, të mbështetur nga dy helikopterë. Po në të njëjtin qark, 50 ushtarë po luftojnë flakët aktive në Mnelë të Vogël, Naraç dhe malin e Tërbunit. Zjarri në zonën e Bërdicës është stabilizuar dhe nën mbikëqyrje, pa paraqitur rrezik për banesat.
Në kryeqytet dhe rrethinat e tij, tre vatra vijojnë aktive: Mali i Dajtit, Kryezi i Kavajës dhe Selita e Malit. Për vatren e Dajtit janë angazhuar 82 efektivë ushtarakë dhe një helikopter, ndërsa në Kryezi ka operuar edhe avioni Air Tractor. Autoritetet nuk raportojnë banesa në rrezik të menjëhershëm.
Dibra, Lezha dhe qarqe të tjera
Në qarkun e Dibrës, zjarret vazhdojnë në Vajkal, Lundre–Madhesh, Qafën e Helmes dhe Cerrujë. Vatra e Lundre–Madheshit po ndihmohet drejtpërdrejt nga Forcat e Armatosura. Në Lezhë, vatrat e Gallatës dhe të zonës Kalivaç–Zimaj–Kashnjet mbeten aktive — në këtë të fundit operojnë 63 efektivë ushtarakë dhe dy helikopterë.
Në Berat, vatra e Vokopolës vijon aktive, ndërsa ajo e lagjes Kala është shuar. Në qarqet e Korçës, Elbasanit, Vlorës, Durrësit, Fierit dhe Kukësit, shumicës së vatrave u është vendosur mbikëqyrja ose janë neutralizuar plotësisht.
Agjencia Kombëtare e Mbrojtjes Civile po koordinon në kohë reale të gjitha strukturat e përfshira — prefekturat, bashkitë dhe njësitë e mbrojtjes civile — duke mbajtur kapacitetet operacionale në gatishmëri të plotë. Autoritetet theksojnë se prioriteti absolut është ruajtja e jetëve të qytetarëve, banesave dhe pronës private, si dhe parandalimi i dëmeve mjedisore në zonat e prekura.
BurimiRTSH
