Bashkimi Evropian ka marrë qëndrim të qartë pas dënimeve historike të shpallura nga Dhomat e Specializuara të Kosovës ndaj katër ish-drejtuesve të Ushtrisë Çlirimtare të Kosovës. Brukseli ka reaguar drejtpërdrejt ndaj deklaratave të kryeministrit të Kosovës, Albin Kurtit, i cili e cilësoi vendimin si "padrejtësi", dhe kryeministrit të Shqipërisë, Edi Ramës, i cili e quajti atë "marre".
Zëdhënësi i Komisionit Evropian për Punë të Jashtme dhe Politikën e Sigurisë, Christian Wigand, theksoi se Dhomat e Specializuara funksionojnë mbi baza plotësisht të pavarura dhe të paanshme. "Bashkimi Evropian merr shënim aktgjykimin e shkallës së parë në çështjen e Prokurorisë së Specializuar kundër Hashim Thaçit, Kadri Veselit, Rexhep Selimit dhe Jakup Krasniqit. Dhomat e Specializuara të Kosovës japin drejtësi duke zhvilluar procedura gjyqësore të drejta, të paanshme dhe të pavarura, të bazuara në parimin e përgjegjësisë individuale penale", deklaroi Wigand.
Zëdhënësi evropian shtoi se personat e dënuar gëzojnë të drejtën e apelit përpara gjyqtarëve të pavarur të një trupi gjykues të veçantë. Ai gjithashtu bëri thirrje që të mbrohen viktimat dhe dëshmitarët dhe të krijohet një mjedis i lirë nga frika dhe hakmarrjet, duke u drejtuar të gjitha palëve dhe aktorëve në Kosovë e në rajon që të tregojnë përmbajtje.
Komisioni Evropian: Aktgjykimet duhen respektuar
Zëdhënësi i Komisionit Evropian për Zgjerim, Guillaume Mercier, duke iu referuar qëndrimit të Komisioneres Marta Kos, nënvizoi se respektimi i vendimeve gjyqësore është detyrim i palëve të interesuara. "Dhomat e Specializuara të Kosovës janë një organ gjyqësor i paanshëm dhe i pavarur. Aktgjykimet e tyre duhen të respektohen dhe personat e dënuar kanë të drejtë të apelojnë", tha Mercier, duke shtuar se çështja lidhet me drejtësinë për viktimat dhe familjet e tyre nga të gjitha komunitetet në Kosovë.
Mercier theksoi gjithashtu se pajtimi mbetet rruga e vetme për të lënë pas ndarjet: "Vetëm përmes pajtimit vendet e rajonit mund t'i tejkalojnë ndarjet dhe të ecin përpara drejt një të ardhmeje të përbashkët, drejt Bashkimit Evropian."
Vendimi historik i 16 shtatorit
Më 16 shtator 2026, Gjykata Speciale shpalli aktgjykimin e shkallës së parë: Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet. Vendimi shkaktoi reagime të forta në mbarë Kosovën dhe Shqipërinë, duke nxitur protesta dhe debate politike intensive.
Qëndrimi i BE-së vjen në një moment të ndjeshëm për Kosovën, vend që aspiron anëtarësimin evropian. Thirrja e Brukselit për qetësi dhe respektim të procesit gjyqësor tregon se kjo çështje do të vijojë të ketë peshë të rëndësishme edhe në dinamikën e raporteve Prishtinë–Bruksel në muajt në vijim.
BurimiEuro news Albania
