Presidenti i Shqipërisë, Bajram Begaj, ka dalë hapur me reagimin e tij pas vendimeve të rënda dënuese që Gjykata Speciale e Hagës shpalli të mërkurën ndaj ish-udhëheqësve të Ushtrisë Çlirimtare të Kosovës. Ai e cilësoi ditën si një moment "trishtimi të thellë", ndërkohë që nënvizoi qëndrimin kombëtar shqiptar: UÇK-ja mbetet e paprekur në nderin dhe dinjitetin e saj historik.
"Trishtim i thellë për vendimin e sotëm. Vendosmëria për të apeluar vendimin është shenjë e fortë integriteti dhe qëndrueshmërie. Për shqiptarët, askush dhe asgjë nuk njollos UÇK-në! Liria ka emër", shkroi Begaj në reagimin e tij publik.
Dënimet e shpallura nga Gjykata Speciale
Gjykata Speciale me seli në Hagë shpalli të mërkurën dënime të ndryshme ndaj katër ish-drejtuesve të UÇK-së. Ish-presidenti i Kosovës, Hashim Thaçi, dhe Jakup Krasniqi u dënuan me nga 25 vjet burgim, ndërsa Kadri Veseli mori dënim prej 18 vitesh. Rexhep Selimi u dënua me 13 vjet burgim. Të gjithë të dënuarit kanë paralajmëruar apelim të vendimit, një qëndrim që presidenti Begaj e vlerësoi si shenjë integriteti dhe palëkundshmërie.
Njoftimi i dënimeve ngjalli reagime të forta edhe jashtë kufijve të Kosovës. Mbështetës të ish-krerëve të UÇK-së u mblodhën afër Hagës, ku situata u tensionua dhe pati përplasje me forcat policore.
Konteksti historik dhe rëndësia kombëtare
UÇK-ja ka çlirimtare luftoi gjatë viteve 1998–1999 kundër agresionit të organizuar serb ndaj popullatës shqiptare të Kosovës — një luftë e mbushur me sakrifica të pallogaritshme, që përfundoi me ndërhyrjen humanitare të NATO-s dhe shpëtimin e qindra mijëra jetëve shqiptare. Figurat e saj kryesore janë të gdhendura thellë në memorien kolektive shqiptare si heronj të çlirimit kombëtar.
Reagimi i Begajt pasqyron ndjenjën e gjerë që sundon ndër shqiptarët: vendimet e një gjykate ndërkombëtare nuk mund të riskruajnë historinë e një lufte të drejtë çlirimtare dhe nuk mund të errësojnë kontributin e atyre që çuan flamurin deri në fitore. Apelimi i njoftuar nga mbrojtjet e të dënuarve hap një fazë të re juridike, ndërkohë që situata politike në Kosovë vazhdon të nxehet — me Partinë Demokratike të Kosovës që ka paralajmëruar ndryshime legjislative lidhur me vetë Gjykatën Speciale.
Shiko edhe
BurimiEuro news Albania
