Kryetari i Partisë Demokratike, Sali Berisha, ka dalë me akuza të ashpra ndaj Olsi Ramës, vëllait të kryeministrit Edi Rama, duke e cilësuar atë si njeriun qendror të industrisë së lojërave të paligjshme të fatit në vend dhe si njërin prej aktorëve kryesorë në skemat mashtruese të Call Center-ave. Deklaratat u bënë gjatë një bashkëbisedimi online me gazetarë, ku Berisha njoftoi edhe refuzimin e plotë të projektligjit qeveritar për lojërat e fatit.
Sipas kreut të PD-së, opozita ka ndërmend të ndërhyjë në mënyrë aktive që çështja e Olsi Ramës të arrijë edhe para autoriteteve gjyqësore të Shteteve të Bashkuara. Argumenti i tij mbështetet në faktin se Olsi Rama zotëron shtetësi të dyfishtë shqiptaro-amerikane dhe se legjislacioni amerikan parashikon ndjekje penale edhe për veprimtari kriminale të kryera jashtë territorit të SHBA-së.
Akuza direkte dhe kërkesë për hetim ndërkombëtar
"Ne jemi të sigurt se Olsi Rama është sot njeriu më kryesor në lojërat ilegale të fatit. Është një nga më kryesorët në vjedhjet e tmerrshme që u bëhen edhe qytetarëve të huaj me Call Center-at. Vendi i tij është para ligjit. Ne do të bëjmë gjithçka që ky qytetar shqiptaro-amerikan të hetohet edhe nga drejtësia e Shteteve të Bashkuara", deklaroi Berisha me ton të prerë.
Berisha shtoi se pavarësisht se veprimtaria e pretenduar kriminale zhvillohet në territorin shqiptar e jo në SHBA, ligjet federale amerikane nuk lejojnë që një shtetas amerikan të ushtrojë aktivitet kriminal kudo në botë pa u mbajtur përgjegjës. Ky argument ligjor, sipas tij, hap rrugën për një ndërhyrje të mundshme të drejtësisë ndërkombëtare në rastin e Olsi Ramës.
Opozita kundër projektligjit: "Është ligji Olsi Rama"
Një pjesë e rëndësishme e deklaratave të Berishës u përqendrua te projektligji i ri për lojërat e fatit, i cili pritet të vijë për votim në Kuvend pas vitesh operimi të sektorit në kushte joformale. Kreu i PD-së e hodhi poshtë kategorikisht çdo mundësi bashkëpunimi me mazhorancën për këtë iniciativë legjislative.
"Ne nuk e votojmë ligjin e lojërave të fatit. Është ligji Olsi Rama", u shpreh Berisha, duke nënkuptuar se projektligji shërben si mjet legjitimizimi i interesave të vëllait të kryeministrit në këtë industri. Qeveria ende nuk ka reaguar zyrtarisht ndaj këtyre akuzave. Debati rreth projektligjit dhe akuzave të opozitës pritet të nxehet në javët në vijim, ndërkohë që çështja e Call Center-ave mashtrues mbetet një ndër sfidat më serioze të luftës kundër krimit ekonomik në Shqipëri.
BurimiFax News
