Projekti pilot i Elbasanit për zhvillimin e energjisë së rinovueshme në ish-zonat industriale metalurgjike pritet të bëhet një pikë reference për një model të ri të planifikimit dhe dhënies së lejeve për investimet energjetike. Ky model ka potencialin të shtrihet në mbarë vendin, duke sjellë përfitime të rëndësishme në fushën e dekarbonizimit dhe tranzicionit të drejtë energjetik.
Sekretariati i Komunitetit të Energjisë, përmes një raporti të publikuar këtë javë, theksoi rëndësinë e përshpejtimit të investimeve në energjinë e rinovueshme. Në këtë raport, Elbasani identifikohet si një nga dy projektet pilot me përparësinë më të lartë në rajon, duke dëshmuar potencialin e tij strategjik.
Zhvillimi i Zonave të Përshpejtimit dhe Asistenca Teknike
Përzgjedhja e Elbasanit, së bashku me Manastirin në Maqedoninë e Veriut, si dy projekte pilot për krijimin e zonave të përshpejtimit të energjisë së rinovueshme, u njoftua fillimisht në gusht të këtij viti. Raporti i Sekretariatit ofron detaje të mëtejshme rreth vlerësimit të këtyre projekteve dhe strategjisë për shtrirjen e përvojës së tyre në nivel kombëtar.
Aktualisht, Sekretariati, në bashkëpunim me Open Society Foundations Western Balkans, po ofron asistencë teknike për bashkinë e Elbasanit, me fokus specifik në ish-zonat e industrisë metalurgjike. Këto projekte demonstrojnë realizueshmërinë dhe përfitimet e zbatimit të hershëm, veçanërisht në lidhje me potencialin strategjik të zonave të përshpejtimit të energjisë së rinovueshme për dekarbonizimin, tranzicionin e drejtë dhe zhvillimin e një politike industriale të gjelbër.
Integriimi në Planet Territoriale dhe Objektivat Kombëtare
Projekti pilot në Elbasan do të ndihmojë në identifikimin e zonave të përshtatshme për investime, duke marrë parasysh faktorë kyç si kufizimet mjedisore, përdorimin e tokës dhe mundësitë e lidhjes me rrjetin elektrik. Pritet që këto projekte bashkiake të pasqyrohen fillimisht në planifikimin territorial vendor dhe rajonal, për t'u zgjeruar më pas në nivel kombëtar dhe për të kontribuar në hartëzimin e koordinuar të territorit.
Shqipëria ka vendosur objektivin më të lartë në Ballkanin Perëndimor për pjesën e energjisë së rinovueshme në konsumin përfundimtar bruto, duke synuar 52% deri në vitin 2030. Në kuadër të Agjendës së Reformave të Bashkimit Europian, Shqipëria është angazhuar të bëjë ndryshime në rregulloret për dhënien e lejeve, me qëllim thjeshtimin e procedurave për energjinë e rinovueshme deri në qershor 2025. Kjo iniciativë e Elbasanit, në këtë kontekst, luan një rol thelbësor në përmbushjen e këtyre objektivave ambicioze.
BurimiMonitor
