Futbolli shqiptar ndërmerr një hap të rëndësishëm drejt rigjenerimit të brezave. Komiteti Ekzekutiv i Federatës Shqiptare të Futbollit ka miratuar zyrtarisht një rregull të ri që detyron klubet e të gjitha niveleve të aktivizojnë lojtarë të rinj me pasaportë shqiptare, duke nisur nga sezoni sportiv 2026–2027. Vendimi shënon një ndryshim strukturor në filozofinë e zhvillimit të futbollit kombëtar.
Sipas rregullores së miratuar, klubi që garojnë në kampionatin Abissnet Superiore dhe në Kupën e Shqipërisë do të kenë detyrimin të vënë në fushë, nga minuta e parë dhe për të paktën një pjesë loje, një futbollist të lindur në vitin 2007 ose më vonë, me pasaportë shqiptare. Ky kusht bëhet edhe më i rreptë për kategoritë e tjera.
Si funksionon rregulli për kategoritë e ndryshme
Për Kategorinë e Parë, të Dytë dhe të Tretë, detyrimi është më i plotë: lojtar i ri duhet të fillojë ndeshjen dhe të luajë gjatë gjithë kohëzgjatjes së saj, me përjashtime vetëm në rastet e parashikuara shprehimisht nga rregullorja. Në rast se ky futbollist nevojitet të zëvendësohet, klubi ka detyrimin të sjellë në fushë një tjetër lojtar që plotëson të njëjtat kritere të moshës dhe shtetësisë. Nëse kjo nuk është e mundur, skuadra do të vazhdojë ndeshjen me një lojtar më pak për periudhën gjatë së cilës vazhdon detyrimi.
Rregullorja sqaron gjithashtu se klubi mban përgjegjësi të plotë për regjistrimin e saktë të lojtarëve dhe për zbatimin e të gjitha dispozitave. Çdo shkelje e kushteve të parashikuara do të trajtohet në bazë të mekanizmave disiplinorë të Federatës.
Objektivi: baza e fortë për ekipet kombëtare
Sipas FSHF-së, ky vendim është pjesë e një strategjie afatgjatë që synon tre qëllime kryesore: rritjen e numrit të minutave që futbollistët shqiptarë të rinj akumulojnë në kampionate, forcimin e konkurrencës ndërmjet talenteve vendase dhe ndërtimin e një modeli të qëndrueshëm zhvillimi për dekadën e ardhshme. Pritet që masa të ketë ndikim të drejtpërdrejtë edhe në cilësinë dhe thellësinë e skuadrave kombëtare të grupmoshave.
Me Shqipërinë duke synuar standarde gjithnjë e më të larta në futbollin evropian, sigurimi i minutave reale të lojës për brezin e ri konsiderohet nga federata si hapi logjik pas investimeve në akademi dhe infrastrukturë. Sezoni 2025–2026 mbetet i fundit pa këtë detyrim, duke i lënë klubeve kohë të mjaftueshme për t'u përgatitur dhe adaptuar skuadrat e tyre.
