Një incident i rëndë shënoi orët e para të mëngjesit të 16 gushtit në Sarandë, kur shefi i Hetimit të Krimit pranë Komisariatit vendor, nënkomisar M. B., u sulmua fizikisht ndërsa po ndërhynte për të qetësuar një konflikt në rrugën "Butrinti". Pas veprimeve hetimore të kryera në bashkëpunim me Prokurorinë e Sarandës, gjashtë persona u vunë nën arrest dhe një tjetër u shpall në kërkim.
Si u zhvillua ngjarja
Rreth orës 03:20, rojet e sigurisë së një lokali në rrugën "Butrinti" u ndeshën me disa persona të tjerë, pa njoftuar asnjëherë policinë për situatën. Nënkomisar M. B., i cili kaloi rastësisht me automjetin e tij pranë vendit të ngjarjes, dalloi konfliktin, ndaloi dhe u prezantua si punonjës policie duke u munduar të parandalojë eskalimin. Në vend që të qetësohen, rojet e sigurisë e sulmuan me grushte edhe efektivin. Ky i fundit kaloi në vetëmbrojtje dhe arriti të alarmojë shërbimet e policisë. Brenda rreth një minute, në vendngjarje mbërritën njësitë e Forcës së Posaçme "Shqiponja" dhe Forcat Kombëtare të Sigurisë, të cilat neutralizuan situatën.
Kontrollet u zgjeruan edhe në fshatin Gjashtë, ku u shoqëruan persona të tjerë të dyshuar si pjesëmarrës në konflikt. Në fund të procesit hetimor u arrestuan: M. K., 35 vjeç, administrator i lokalit; E. N., 38 vjeç; F. H., 35 vjeç; I. Ç., 34 vjeç; A. K., 31 vjeç, ushtarak i stacionuar në Zall-Herr dhe njëkohësisht rojë sigurie në lokal; si dhe B. S., 29 vjeç, me profesion taksist. Roja e sigurisë P. D., 28 vjeç, është shpallur në kërkim.
Dy efektivë pezullohen nga detyra
Ngjarja nxori në pah edhe shkelje të rënda brenda radhëve të policisë. Drejtori i Përgjithshëm i Policisë së Shtetit, Skender Hita, urdhëroi pezullimin e menjëhershëm të Inspektorit A. Sh., efektiv i Repartit "RESI", dhe të nënkomisarit A. B., efektiv i RENEA-s. Të dy punonin pa leje si roje sigurie në lokalin ku shpërtheu konflikti dhe nuk njoftuan asnjëherë strukturat policore për situatën.
Policia theksoi se pavarësisht se ndodheshin jashtë orarit të shërbimit, dy efektivët kishin detyrimin ligjor dhe moral të ndërhynin për të shmangur keqësimin e situatës. Drejtoria e Standardeve Profesionale ka nisur menjëherë hetim disiplinor, duke dërguar një grup pune në Sarandë. Hetimet penale vazhdojnë nga Prokuroria e Sarandës me qëllim dokumentimin e plotë të ngjarjes dhe vënien para drejtësisë të të gjithë personave të përfshirë.
BurimiRTSH
