Trupi gjykues i Dhomave të Specializuara në Hagë ka shpallur penalisht përgjegjës Hashim Thaçin, Kadri Veselin, Rexhep Selimin dhe Jakup Krasniqin për krime lufte, duke përfshirë ndalim arbitrar, trajtim mizor, torturë dhe vrasje të paligjshme. Gjykatësi kryesues Charles Smith theksoi gjatë leximit të aktgjykimit se përgjegjësia e secilës prej palëve është individuale, por se të katërt vepruan bashkërisht dhe arritën marrëveshje për realizimin e një qëllimi të përbashkët kriminal. Sipas tij, ata ngritën objektet e ndalimit, caktuan persona të besuar në role dhe pozita kyçe, dhe shpërndan komunikata që pasqyronin politikat e tyre.
Thaçi dhe Veseli: "Anëtar kyç" dhe "kontribut i qenësishëm"
Për ish-presidentin e Kosovës, Hashim Thaçin, trupi gjykues përdori cilësimin "anëtar kyç" në formulimin dhe zbatimin e qëllimit kriminal të përbashkët. Smith konstatoi se Thaçi mori pjesë drejtpërdrejt në krime, inkurajoi veprime kriminale nëpërmjet të ashtuquajturës "luftë speciale" dhe, si pjesë e Drejtorisë Politike, ushtroi kompetencë ekskluzive mbi vendimet e UÇK-së. "Thaçi, së bashku me të akuzuarit e tjerë, emëroi persona besnikë duke mundësuar që urdhrat e tyre të zbatoheshin", deklaroi gjykatësi.
Për Kadri Veselin, trupi gjykues konstatoi se ai dha "kontribut të qenësishëm" duke emëruar persona besnikë në pozita kyçe dhe duke u përfshirë personalisht në zbatimin e luftës speciale të Shtabit të Përgjithshëm. Veseli ishte gjithashtu i përfshirë në identifikimin dhe shënjestrimin e kundërshtarëve dhe kishte dijeni të plotë për krimet e kryera.
Selimi dhe Krasniqi: Role operative dhe strukturore
Rexhep Selimi u cilësua nga trupi gjykues si figure me rol thelbësor në krijimin e zonave operative të UÇK-së. Gjykata sqaroi se vetë krijimi i këtyre zonave nuk përbënte veprim kriminal, por Selimi i vizitonte rregullisht, mblidhte informacione për persona të dyshuar dhe inkurajonte shënjestrimin e kundërshtarëve. Trupi gjykues vërejti gjithashtu se Selimi mori pjesë drejtpërdrejt në arrestimin e 13 parlamentarëve dhe nuk ndërmori asnjë hap për ndalimin e krimeve, pavarësisht dijenit të tij.
Për Jakup Krasniqin, Smith nënvizoi se ai krijoi strukturat dhe organet institucionale — si Policia Ushtarake dhe Njësitë Speciale — me qëllim zbatimin e politikës ndaj kundërshtarëve. Krasniqi kishte njohuri të qarta për ndalimin, arrestimin dhe vrasjen e paligjshme të tyre, dhe u angazhua aktivisht në promovimin e kryerjes së këtyre krimeve.
Në fund të leximit, trupi gjykues konstatoi se të katër të akuzuarit janë penalisht përgjegjës për krimet e luftës të ndalimit arbitrar ndaj 385 personave, si dhe për torturë, trajtim mizor dhe vrasje të paligjshme ndaj 96 personave. Aktgjykimi pritet të apëlohet nga mbrojtja — avokati i Thaçit e ka cilësuar vendimin "ditë e zezë për drejtësinë". Procesi, i cili ka tërhequr vëmendje të gjerë ndërkombëtare, mbetet një nga çështjet më të ndjeshme politike dhe historike të rajonit.
BurimiRTSH
