Hashim Thaçi, ish-president i Kosovës dhe ish-udhëheqës i Ushtrisë Çlirimtare të Kosovës, u dënua sot me 25 vjet burgim nga Gjykata e Specializuar me seli në Hagë. Trupi gjykues e shpalli atë penalisht përgjegjës për një sërë krimesh lufte të kryera gjatë periudhës së luftës çlirimtare në Kosovë.
Aktgjykimi përfshin gjetje të rënda: Thaçi u shpall fajtor për ndalim të paligjshëm, trajtim mizor, torturë dhe vrasje të paligjshme. Konkretisht, gjykata konstatoi se ai mbante përgjegjësi penale për trajtim mizor ndaj të paktën 45 personave, për torturë ndaj të paktën 303 personave, si dhe për vrasje të paligjshme ndaj të paktën 96 personave.
Dënimet sipas veprave penale
Trupi gjykues shqiptoi dënime të ndara për secilën vepër penale: 15 vjet burgim për arrestim dhe ndalim të paligjshëm; 4 vjet për trajtim mizor; 20 vjet për torturë; dhe 23 vjet për vrasje të paligjshme. Megjithatë, sipas praktikës gjyqësore ndërkombëtare, dënimet u bashkuan në një dënim unik prej 25 vjetësh. "Trupi gjykues ju dënon me një dënim të unifikuar me 25 vite burgim, në të cilin llogaritet koha e kaluar në paraburgim", u lexua gjatë shpalljes së vendimit.
Gjykata vuri në dukje se Thaçi u shpall i pafajshëm për një numër incidentesh të tjera të përfshira fillimisht në akuzë — raste ku provat nuk arritën të plotësonin standardin e kërkuar të provimit penal ose ku elementet e nevojshme të përgjegjësisë nuk u vërtetuan.
Konteksti politik dhe reagimet
Gjykata e Specializuar e Kosovës, me seli në Hagë, u krijua nën presion ndërkombëtar për të hetuar krimet e pretenduara të kryera gjatë dhe pas luftës së viteve 1998–1999 — luftë kjo që u zhvillua në kontekstin e agresionit serb ndaj popullatës shqiptare të Kosovës dhe që u ndal me ndërhyrjen humanitare të NATO-s. Thaçi u dorëzua vullnetarisht në gjykatë në dhjetor 2020 dhe ka qëndruar në paraburgim që atëherë.
Vendimi ka shkaktuar reagime të forta në Kosovë dhe Shqipëri. Kryeministri Edi Rama e cilësoi dënimin si "marre", duke shprehur pakënaqësinë e tij ndaj procesit. Shumë ish-luftëtarë dhe figura politike kosovare e shohin gjykatën me skepticizëm, duke argumentuar se ajo anashkalon kontekstin historik të luftës çlirimtare dhe krimit shtetëror serb. Vendimi pritet të nxisë debate të nxehta politike si në Prishtinë, ashtu edhe në Tiranë, lidhur me mënyrën si historia e UÇK-së dhe e luftës për liri trajtohet nga institucionet ndërkombëtare.
BurimiRTSH
