Kryeministri Edi Rama ka dalë me një qëndrim të prerë ndaj Beogradit, pas shkëmbimit të ashpër diplomatik mes ministrave të jashtëm të Shqipërisë dhe Serbisë rreth planeve serbe për ndryshimin e rrjedhës së lumit Ibër. Nëpërmjet rrjetit X, Rama hodhi poshtë narrativën serbe me argumente të mbështetura në të drejtën ndërkombëtare, duke riafirmuar pavarësinë e plotë të Kosovës.
Shkëmbimi diplomatik nisi me deklaratat e ministrit shqiptar të Jashtëm, Ferid Hoxha, i cili paralajmëroi Beogradin se çdo projekt mbi lumin Ibër mund të ketë pasoja direkte për Kosovën. Ministri serb Marko Gjuriç reagoi duke akuzuar Tiranën për ndërhyrje dhe duke evokuar sërish spekulimet mbi "Shqipërinë e Madhe". Rama vendosi t'i jepte fund kësaj debati me një përgjigje të gjatë dhe të qartë.
Rama: "Serbia e humbi Kosovën — hartat nuk përshtaten me imagjinatën politike"
"Sa herë që Shqipëria flet për Kosovën, menjëherë thirret në skenë 'Shqipëria e Madhe', sikur përsëritja ta shndërrojë një fantazmë të vjetër në argument të vlefshëm. Nuk do të ndodhë," shkroi Rama. Kryeministri u shpreh se Shqipëria nuk ka asnjë pretendim ndaj territorit serb dhe se nuk ka nevojë për asnjë koncept territorial për të qëndruar pranë Kosovës: "Kosova është një shtet më vete. Shqiptarët e Kosovës kanë Republikën e tyre, institucionet e tyre dhe të drejtën për të vendosur vetë për të ardhmen e tyre."
Mbi çështjen e lumit Ibër, Rama qëndron te argumenti teknik dhe juridik: Ibri është sistem ujor ndërkufitar dhe Serbia gëzon të drejtën të menaxhojë burimet brenda kufijve të saj, por nuk mund të pretendojë se pasojat e mundshme për një vend tjetër ndalen magjikisht te kufiri. "Lumenjtë kanë zakonin e pakëndshëm të ndjekin gjeografinë dhe jo deklaratat diplomatike," theksoi ai, duke shtuar se pikërisht për këtë ekziston e drejta ndërkombëtare e ujërave.
Thirrje për fqinjësi të mirë, por pa revizionizëm historik
Rama u ndal edhe te situata e komunitetit serb në Kosovë, duke pohuar se të drejtat, siguria, prona dhe trashëgimia kulturore e tyre duhet të mbrohen, siç u detyrohet çdo shteti demokratik ndaj qytetarëve të tij. Megjithatë, ai vuri në dukje kontradiktën e hapur të Beogradit: paralajmëron Shqipërinë kundër zgjerimit etnik, ndërkohë që i referohet territorit të një shteti sovran sikur të ishte ende pronë serbe.
Kryeministri mbajti një ton të hapur ndaj Serbisë si fqinj: "Shqipëria e respekton Serbinë, dëshiron marrëdhënie të mira fqinjësore dhe dëshiron që i gjithë rajoni, përfshirë Serbinë, të jetë pjesë e Evropës." Por kushtëzoi këtë vizion: para se kufijtë të bëhen më pak të rëndësishëm, duhen pranuar kufijtë që ekzistojnë tashmë — thelbi i modelit evropian të integrimit. Deklarata e Ramës vjen si një prej përgjigjeve më të plota institucionale shqiptare ndaj pretendimeve serbe mbi Kosovën dhe burimet e saj natyrore.
BurimiEuro news Albania
