Kryeministri Edi Rama ka dalë me një reagim të ri publik lidhur me rastin e Erjon Vishkullit, 28-vjeçarit nga Elbasani i cili u plagos në sy gjatë protestave në Tiranë. Shkak për ndërhyrjen e Ramës ishte një postim i motrës së të riut, e cila vuri në dyshim versionin zyrtar mbi organizimin dhe financimin e trajtimit mjekësor të vëllait të saj në Itali.
Në rrjetet sociale, kryeministri e cilësoi ndërhyrjen e tij si një akt krejtësisht personal dhe humanitar. "Siç informova më parë, iniciativën për shërbimin e specializuar mjekësor të djalit në Itali nuk e kanë marrë 'persona', po e kam marrë unë personalisht dhe vajtja e tij në Romë me avion mjekësor, si edhe mbulimi i shpenzimeve janë mundësuar pikërisht nga SHTETI dhe nga askush tjetër!", shkroi Rama.
Takimi në aeroport dhe arsyeja humanitare
Rama zbuloi gjithashtu se kishte takuar personalisht të riun pikërisht para nisjes për në Itali, duke i uruar shërim të shpejtë. "Madje i kam uruar të shkuara përpara se sa të nisej bashkë me të vëllanë nga salla VIP e aeroportit, prej ku nisem për jashtë edhe unë vetë, Presidenti i Republikës apo Kryetari i Kuvendit", sqaroi ai, duke nënvizuar kështu se bëhet fjalë për të njëjtat hapësira që përdorin edhe institucionet e larta të shtetit.
Ndaj akuzave për kërkim të vëmendjes politike, kryeministri u shpreh i prerë: "Aspak për protagonizëm, sepse protagonizmin këto ditë e kanë të gjithin dhunuesit dhe nxitësit e tyre, po për humanizëm, sepse kur pushon marrëzia e gurëve e molotovëve, edhe dhunuesit e lënduar janë qytetarë të këtij vendi që duhen ndihmuar, mjekuar, shëruar".
Debati publik vazhdon
Reagimi i kryeministrit vjen si përgjigje ndaj postimit të motrës së Vishkullit, e cila kishte kundërshtuar publikisht disa prej pohimeve të bëra më parë nga Rama në lidhje me mbulimin shtetëror të shpenzimeve. Pa iu referuar konkretisht pretendimeve të saj, Rama zgjodhi të riafirmonte versionin e vet, duke i drejtuar fjalën "çdokujt që e lexon, shpërndan apo publikon postimin e saj".
Rasti i Erjon Vishkullit ka ngjallur debate të ashpra në opinionin publik shqiptar. Trajtimi i tij mjekësor jashtë vendit, rrethanat e plagosjes gjatë protestave dhe mënyra e komunikimit institucional kanë shërbyer si pikë fërkimi midis qeverisë dhe kritikëve të saj. Rama e mbyll reagimin me një urim shërimi për të riun, duke lënë të hapur pyetjen nëse ky debat ndërmjet palëve do të vazhdojë apo jo.
Shiko edhe
BurimiTelegrafi
