Ish-deputeti i Partisë Demokratike, Ervin Salianji, ka lëshuar akuza të forta kundër mazhorancës qeverisëse, duke e lidhur atë drejtpërdrejtë me krimin e organizuar dhe korrupsionin. Në një postim të tijin në rrjetet sociale, Salianji theksoi se Kryeministri Edi Rama dhe qeveria e tij përfaqësojnë “turpin e Shqipërisë”.
Sipas Salianjit, gjatë periudhës së qeverisjes së Ramës, 390 zyrtarë të lartë janë larguar nga detyra ose janë dënuar për vepra të rënda penale, duke filluar nga prostitucioni dhe krimi i organizuar, deri te trafikimi dhe vjedhjet e zakonshme. Ai pretendoi se qeveria qëllimisht e ka shndërruar vendin në një prodhues të kanabisit dhe më pas ka ndërtuar infrastrukturën për trafikun e kokainës dhe heroinës. Salianji përmendi edhe arrestimin e dy zëvendëskryeministrave, si dhe hetimet ndaj ministrave, kryetarëve të bashkive dhe bashkëpunëtorëve të afërt të pushtetit. Deklaratat e tij përfshinë edhe kreun e SHISH-it, të cilin e akuzoi për dëmtim të institucioneve të sigurisë kombëtare.
Lidhja e pushtetit me krimin
Ish-deputeti demokrat theksoi se krimi nuk është më jashtë shtetit, por është bërë pjesë e strukturave të tij dhe po përdoret për të luftuar qytetarët. Ai deklaroi se Edi Rama ka ndërtuar një realitet ku krimi nuk përpiqet më të ndikojë pushtetin, pasi sipas tij, i gjithë pushteti i është dorëzuar krimit. Salianji pohoi se kryeministri ia ka deleguar qeverisjen krimit përmes individëve si Ergys Agasi, Belinda Balluku dhe Ron Yefet, duke e përshkruar qeverinë e Ramës si më të korruptuarën në Evropë.
Shqipëria bosh dhe e ardhmja
Gjithashtu, Salianji akuzoi kryeministrin se vazhdon të mburret në Shtetet e Bashkuara për pozicionin e vendit, ndërkohë që Shqipëria po boshatiset. Sipas tij, pothuajse 1 milion shqiptarë janë larguar nga vendi. Ai vlerësoi shqiptarët që jetojnë jashtë vendit, të cilët, në pikëpamjen e tij, e mbajnë lart flamurin shqiptar përmes punës, dijes dhe suksesit të tyre. Për kontrast, Salianji tha se profesionistët në Shqipëri përballen me pengesa dhe detyrohen t'u nënshtrohen njerëzve të përfshirë në krim, të cilët kanë marrë pozita pushteti, vetëm për të nisur çfarëdo lloj pune.
BurimiAlbeu
