Konflikti mes Shteteve të Bashkuara dhe Iranit ka hyrë në ditën e gjashtë të armiqësive të rinovuara, me sulme të ndërsjella që kanë goditur objektiva të shumta në të dyja anët. Teherani ka njoftuar se ka qëlluar baza ushtarake amerikane në vendet fqinje të Gjirit Persik, duke përfshirë Jordaninë, Kuvajtin dhe Bahrejnin, ndërsa ushtria amerikane ka zhvilluar gjatë natës një valë sulmesh gjashtëorëshe mbi disa zona brenda Iranit.
Komanda Qendrore Amerikane (Centcom) bëri të ditur se sulmet e saj synuan qendrat e komandës, sistemet e mbrojtjes ajrore dhe instalimet e mbikëqyrjes bregdetare, duke përfshirë qytetin port Bandar Abbas dhe Ishullin e Madh Tunb. Sipas Centcom, qëllimi i këtyre goditjeve ishte të dobësohej kapaciteti i Iranit për të kërcënuar lundrimin e lirë nëpër Ngushticën e Hormuzit. Shpërthime u dëgjuan në disa qytete iraniane dhe sistemet e mbrojtjes ajrore u aktivizuan mbi Teheran.
Negociatat në ngërç, Trump paralajmëron masa të reja
Presidenti amerikan Donald Trump kishte paralajmëruar Iranin të sillej "si duhet" ose të përballej me pasoja të mëtejshme ushtarake nëse nuk kthehej në tryezën e bisedimeve. Të martën, Trump kërcënoi se do të godiste infrastrukturën energjetike iraniane nëse Teherani vazhdonte të shmangej nga dialogu. Nga ana e tij, negociatori kryesor iranian Mohammad Bagher Ghalibaf deklaroi se Irani nuk kishte "asnjë arsye" të zbatonte ndonjë marrëveshje që nuk i shërbente interesave të vendit, duke shtuar se siguuria kombëtare e Iranit varet nga ruajtja e kontrollit mbi Ngushticën e Hormuzit.
Situata u ndërliku edhe më tej kur zëdhënësi i Ministrisë së Jashtme iraniane njoftoi se një qendër për trajtimin e kancerit tek fëmijët në qytetin perëndimor Ahvaz u evakuua pasi sulmet goditën zona afër saj. Pamjet video të vërtëtuara treguan goditje në tre qytete bregdetare iraniane — Çabahar, Ahvaz dhe Bandar Abbas.
Ngushtica e Hormuzit dhe pasojat globale
Ngushtica e Hormuzit, rruga detare kritike nëpër të cilën kalon një pjesë e konsiderueshme e eksporteve botërore të naftës, mbetet e bllokuar pasi Irani e mbylli atë si përgjigje ndaj sulmeve amerikano-izraelite. SHBA-ja ka rivendosur bllokadën ndaj porteve iraniane, e cila ishte hequr përkohësisht si pjesë e një memorandumi mirëkuptimi të arritur muajin e kaluar. Pas rifillimit të bllokadës, Garda Revolucionare iraniane paralajmëroi se SHBA-ja duhet të "presë mbylljen e rrugëve të tjera të eksportit të naftës dhe gazit" që i shërbejnë interesave amerikane dhe të aleatëve të saj.
Pasoja e drejtpërdrejtë e krizës është rritja e mprehtë e çmimeve të naftës në tregjet globale, shkaktuar nga ngecja praktike e trafikut të tankistëve nëpër këtë rrugë kyçe tregtare. Për Shqipërinë dhe vendet e rajonit, kjo dinamikë rrezikon të reflektohet në rritje të çmimeve të karburanteve dhe presion të ri inflacionist. Ndërkohë, si shenjë të vetme stabilizimi të mundshëm, Trump mirëpriti lirimin e një qytetareje amerikane që kishte qenë e ndaluar në Iran që nga dhjetori i vitit 2024, duke e quajtur këtë gjestin iranian "akt mirëvulljeje".
BurimiBBC World
