Më shumë se një milion persona janë evakuuar nga banesat e tyre në Kinën lindore, përfshirë zonën e Shangait, teksa tajfuni “Dolphin” ka goditur bregdetin duke shkaktuar erëra të fuqishme, reshje të dendura dhe përmbytje. Sipas autoriteteve meteorologjike kineze, shpejtësia maksimale e erës arriti në rreth 150 km/orë kur stuhia preku tokën për herë të parë në Yuhuan, në provincën Zhejiang, rreth orës 17:30 me orën lokale. Rreth një orë më vonë, tajfuni zbarkoi për herë të dytë pranë qytetit të Wenzhou.
Stuhia ka shkaktuar ndërprerje të mëdha në transport. Vetëm në Shangai janë anuluar rreth 1,400 fluturime, ndërsa autoritetet kanë marrë masa të shumta për mbrojtjen e banorëve. Fillimisht, autoritetet kineze kishin ngritur alarmin në nivelin më të lartë të kuq për tajfunin “Dolphin”, por mëngjesin e kësaj të hëne (10 gusht) niveli i paralajmërimit u ul, pasi stuhia humbi një pjesë të fuqisë së saj.
Megjithatë, autoritetet vijojnë të paralajmërojnë për reshje të rrëmbyeshme, përmbytje të mëdha dhe rrëshqitje dheu deri të mërkurën. Reshje intensive janë parashikuar në provincat Shandong, Henan, Hubei, Anhui, Jiangsu dhe Zhejiang, si edhe në qytetin e Shangait. Banorëve u është kërkuar të shmangin aktivitetet në natyrë. Disa prej atraksioneve më të njohura turistike janë mbyllur përkohësisht, përfshirë pjesë të Disneyland dhe Legoland, si dhe disa platforma panoramike përgjatë Bund në Shangai.
Sipas parashikimeve meteorologjike, disa zona të provincës Zhejiang mund të përballen me 250 deri në 500 milimetra reshje gjatë ditëve të ardhshme. Në Hangzhou, kryeqytetin e Zhejiang, autoritetet kanë hequr përkohësisht tarifat e parkimit në hapësirat publike për shoferët që kërkojnë strehim për shkak të erërave të forta dhe përmbytjeve. Në Wenzhou janë zhvendosur rreth 900 mijë banorë dhe janë hapur më shumë se 1,000 strehimore emergjente. Ndërsa në qytetin e Taizhou janë evakuuar rreth 390 mijë persona.
