Këshilli i Legjislacionit u mblodh sot për të shqyrtuar pasojat e vendimit të Gjykatës Kushtetuese, e cila shfuqizoi vendimin e Kuvendit që kishte refuzuar ngritjen e komisionit hetimor parlamentar mbi zgjedhjet e 11 majit 2025. Ky komision ishte kërkuar nga opozita dhe rrëzimi i tij nga mazhoranca kishte shkaktuar tension të mprehtë politik në muajt e fundit.
Gjiknuri: Kuvendi s'ka zgjidhje tjetër veçse të bindhet
Kryetari i Këshillit të Legjislacionit, Damian Gjiknuri, qartësoi se vendimi i Gjykatës Kushtetuese është i detyrueshëm dhe se institucioni parlamentar nuk ka tagër ta anashkalojë. Ai shpjegoi se Këshilli i Legjislacionit, në bazë të Rregullores së Kuvendit dhe urdhrit të Kryetarit të Kuvendit, mban përgjegjësinë për të caktuar mënyrën konkrete të zbatimit të vendimit. "Gjykata Kushtetuese ia ka kthyer Kuvendit, pra e ka shfuqizuar pjesërisht këtë vendim. Dihet që vendimi i Gjykatës Kushtetuese është i detyrueshëm, prandaj Kuvendi do të gjejë modalitetet e nevojshme për të rifutur edhe një herë këtë çështje", deklaroi Gjiknuri, duke saktësuar njëkohësisht se pjesa tjetër e ankimit të opozitës ishte refuzuar nga Gjykata.
Kaso kërkon veprim të shpejtë para zgjedhjeve të ardhshme
Nga radhët e Partisë Demokratike, deputeti Ivi Kaso kërkoi që procesi të përshpejtohet pa humbur kohë. Sipas tij, zbatimi i vendimit gjyqësor nuk është thjesht çështje teknike, por shprehje e lojalitetit kushtetues që institucionet duhet të tregojnë ndaj njëri-tjetrit. "Është përgjegjësi e këtij Kuvendi të adresojë në kohën më të shpejtë. Tregon përgjegjësi institucionale dhe hyn në parimin e lojalitetit kushtetues që duhet të kenë institucionet me njëri-tjetrin", u shpreh Kaso.
Deputeti demokrat theksoi gjithashtu se urgjenca vjen edhe nga nevoja praktike: problematikat e konstatuara gjatë zgjedhjeve të 11 majit duhet të shqyrtohen dhe adresohen përpara se të mbahen zgjedhjet e ardhshme, në mënyrë që të mos përsëriten të njëjtat mangësi. Ai i bëri thirrje shumicës parlamentare të "detajojë hapat e saktë proceduralë" për ta bërë vendimin e Kushtetueses të zbatueshëm në praktikë.
Çështja e komisionit hetimor për zgjedhjet e 11 majit 2025 mbetet një nga pikat kryesore të fërkimit mes qeverisë dhe opozitës. Vendimi i Gjykatës Kushtetuese i jep tashmë opozitës një argument ligjor të fortë, ndërsa sytë e vëzhguesve politikë janë ngulur te mënyra dhe shpejtësia me të cilën Kuvendi do ta çojë përpara këtë proces në javët në vijim.
BurimiRTSH
