Banka e Shqipërisë ka hartuar projekt-rregulloren për sistemin e pagesave të menjëhershme, një hap që pritet të ndryshojë rrënjësisht mënyrën si qytetarët dhe bizneset kryejnë transferta bankare. Sipas dokumentit të ri, çdo transaksion me vlerë deri në 500 mijë lekë ose 5 000 euro do të finalizohet brenda 10 sekondave — një ndryshim rrënjësor krahasuar me sistemin aktual, ku transfertat mund të zgjatin disa orë pune apo të shtyhë deri në ditën e ardhshme.
Sot, transfertat e iniciuara pas orës 13:45 finalizohen vetëm në ditën pasardhëse të punës. Sistemi i ri do të operojë pa ndërprerje — 24 orë në ditë, shtatë ditë në javë — duke eliminuar kufizimet e orës dhe të ditëve të pushimit.
Komisione simbolike dhe çmime të standardizuara
Projekt-rregullorja përcakton qartë edhe regjimin e komisioneve. Transfertat në lekë deri në 40 mijë lekë do të jenë pa asnjë komision për klientin. Për shumat nga 40 mijë deri në 1 milion lekë, komisioni maksimal i lejuar nga bankat dhe institucionet financiare nuk mund të kalojë 100 lekë, ndërsa për transfertat e kryera nëpërmjet internet banking ky tavan ulet në 50 lekë.
Për të stimuluar bankat të mbajnë çmimet sa më të ulëta, Banka e Shqipërisë ka vendosur edhe komisione minimale ndaj vetë institucioneve financiare: për transaksionet deri në 40 mijë lekë, bankat nuk do të paguajnë asgjë, ndërsa për ato mbi këtë shumë — qofshin në lekë apo euro — do të aplikohet një komision prej vetëm 1 leku për çdo transaksion.
Akses i drejtpërdrejtë edhe për institucionet jo-bankare
Ndër risitë e rëndësishme të rregullores është zgjerimi i rrethit të pjesëmarrësve të drejtpërdrejtë në sistemet kombëtare të pagesave. Krahas Bankës së Shqipërisë dhe bankave tregtare, akses direkt do të kenë tashmë edhe operatorët e shërbimeve të pagesave që nuk janë banka — si institucionet e pagesave dhe ato të parasë elektronike. Kjo do t'u japë atyre mundësinë të ofrojnë shërbime me të njëjtat kushte si bankat tradicionale, gjë që pritet të nxisë konkurrencën dhe të ulë më tej kostot për konsumatorët.
Kjo kërkesë kishte kohë që vinte nga sektori financiar jo-bankar, veçanërisht pas miratimit të ligjit "Për shërbimet e pagesave", i cili transpozoi Direktivën Europiane të Pagesave PSD 2. Rregullorja e re vjen si hapi zbatues i kësaj kuadri ligjor.
Për qytetarët shqiptarë, ky sistem paraqet një lehtësi të ndjeshme të përditshme: nga pagesa e qirasë në fundjavë deri te transaksionet e bizneseve të vogla, shpejtësia dhe disponueshmëria 24-orëshe e sistemit të ri janë të drejtpërdrejta dhe konkrete. Rregullorja pritet të hyjë në fuqi pasi të kalojë procesin e konsultimit publik dhe miratimit zyrtar.
BurimiMonitor
