Konferenca e Kryetarëve u mblodh sot për të shqyrtuar kërkesën e opozitës për zhvillimin e një mocioni me debat në Kuvend, në lidhje me çështjen e ish-drejtoreshës së Shërbimit Informativ të Shtetit (SHISH), Vlora Hyseni. Partia Demokratike kërkon që kryeministri Edi Rama të japë llogari publike, duke qenë se ai vetë e emëroi Hysenin në krye të këtij institucioni kyç.
Gazetari Ergys Gjençaj, i cili raportoi drejtpërdrejt nga Kuvendi, bëri të ditur se sipas opozitës, arrestimi i Vlora Hysenin është tregues i qartë i degradimit të thellë që ka pësuar sistemi i institucioneve shtetërore në vend. Demokratët e cilësojnë si çështje urgjente shqyrtimin e këtij mocioni, me synim vendosjen e përgjegjësisë politike për emërimet dhe veprimet e qeverisë në institucionet e sigurisë.
Gjykata Kushtetuese jep të drejtë opozitës për komisionin hetimor
Gjençaj njoftoi gjithashtu se Këshilli Legjislativ do të mblidhej në orën 11:00 për të shqyrtuar vendimin e Gjykatës Kushtetuese të datës 1 qershor të këtij viti, i cili lidhet me kërkesën e Partisë Demokratike për ngritjen e një komisioni hetimor parlamentar mbi zgjedhjet e 11 majit. Sipas tij, Gjykata Kushtetuese vendosi në favor të opozitës, duke detyruar Kuvendin të ngrejë komisionin e kërkuar hetimor.
BurimiAlbeu
