Është i vetmi person i akuzuar që nuk u gjykua kurrë për tragjedinë e Gërdecit”
Familja Durdaj i është drejtuar SPAK-ut me kërkesë që të dërgojë në gjyq Fatmir Mediun, si i vetmi person i akuzuar, por i pa gjykuar deri më tani, për rolin e tij në ndërtimin e fabrikës së armëve në Gërdec, nga shpërthimi i së cilës humbën jetën e 26 shtetas, u plagosën qindra të tjerë.
Pas 13 vjetësh nga kjo tragjedi, Zamira dhe Feruzan Durdaj të cilët humbën djali i tyre 7 vjeçar, kërkojnë që drejtësia të gjykojë të gjithë të akuzuarit e kësaj ngjarjeje.
Kërkesa e familjes Durdaj bazohet në ndryshimet e Kodit të Procedurës Penale në vitin 2017, i cili i jep të drejtën viktimës së një krimi të kërkojë procedimin e fajtorit.
“Një nga personat e pandehur që nuk është gjykuar deri në fund, madje nuk është gjykuar asnjëherë, është edhe shtetasi Fatmir Mediu.
Dispozita në fjalë i jep të drejtën viktimës dhe trashëgimtarëve të tij, që të kërkojnë nga organet përkatëse, që të kryejnë të gjitha veprimet e duhura për të dërguar përpara drejtësisë personat ndaj të cilëve ka prova të mjaftueshme për të kërkuar dënimin e tyre.
Deri më sot nuk ka gjetur zgjidhje çështja më sipër, por me ndryshimin e legjislacionit përkatës, besojmë se jemi në kushtet e duhura që kjo kërkesë të marrë përgjigje pozitive dhe çështja në fjalë të dërgohet në gjykatë”- argumentohet kallëzimin penal drejtuar SPAK-ut.
Në vitin 2009, në cilësinë e Ministrit të Mbrojtjes, Fatmir Mediu u mor nën hetim për veprën penale të shpërdorimit të detyrës, por më 14 shtator 2009, Gjykata e Lartë vendosi pushimin e çështjes penale ndaj tij, me arsyetimin se ky i fundit ka ri fituar imunitet sepse u rizgjodh deputet në Kuvendin e Shqipërisë.
Pas këtij momenti, organi i akuzës nuk ka kryer asnjë veprim të mëtejshëm për të ridërguar në gjykatë çështjen ndaj këtij personi, dhe pse familja Durda ka bërë bërë disa kallëzime në ish Prokurorinë e Përgjithshme dhe ka hapur dhjetëra procese gjyqësore.
Zamira dhe Feruzan Durda, shpresojnë që reforma në drejtësi ,më së paku do të marr nën hetim një prej personave që ato e akuzojnë si përgjegjës për humbjen e djalit të tyre.
(Burimi “Gazeta Tema”)
