Dyshohet se ka lidhje me zhdukjen e dy shokëve, kjo është fuoristrada e blinduar që është sekuestruar në Sarandë
Makina që shikoni në foto, një fuoristradë e blinduar e llojit “Jeep Grand Cherokee”, është sekuestruar nga Policia e Sarandë pasi dyshohet se ka lidhje me personat që kanë rrëmbyer dhe më pas zhdukur Leonard Thodhorin dhe Fatmir Sulovarin.
Fuoristrada me xhama të zinj dhe targa greke BOO – 9195, është zbuluar në një plantacion manderinash në fshatin Xarrë të Bashkisë Konispol.
Shërbimet e Komisariatit të Policisë Sarandë, Operacionalja, grupet e FNSH dhe RENEA janë duke kërkuar ditët e fundit në disa zona në jug të vendit, pasi dyshohet se Leonard Thodhori dhe Fatmir Sulovari janë vrarë e groposur në fshatin Vrinë.
Këta shtetas rezultojnë të jenë zhdukur më datë 6 prill 2023 dhe dy ditë më pas, familjarët kanë bërë denoncim në polici. Kërkimet janë duke u zhvilluar nga deti dhe toka, ndërsa deri tani pavarësisht detajeve të shumta dhe sekuestrimit të disa makinave, ende nuk ka të arrestuar.
