Shqipëria është zgjuar mëngjesin e kësaj të mërkure “nën pushtetin” e motit të keq, me reshjet e shiut që kanë shkaktuar përmbytje dhe bllokim rrugësh në disa zona të vendit.
Meteorologia, Lajda Porja, thotë se reshjet me intensitet mesatar deri të lartë do të vijojnë deri në orët e mbrëmjes. Gjatë një interviste për Klan News, sinoptikania tha se nesër do të ketë një përmirësim të motit, por dita e premte do të risjellë një stuhi që do të godasë brigjet e vendit tonë. Sipas meteorologes stuhia do të jetë e pranishme në vendin tonë deri më datë 20 nëntor.
“Lajmet nuk janë shumë të mira, parashikohet që deri në 5 të mbasdites zonat veriore dhe qendrore do kenë intensitet reshjesh mesatare e herë pas here të lartë. Do bien mbi 80 mm që është një sasi e lartë duke marrë parasysh kohën afatshkurtër. Pastaj në zonat jugore nga ora 7 e mbrëmjes do ketë probleme qarku i Vlorës apo Gjirokastrës. Parashikohet të kemi një ndërprerje të reshjeve pas orës 10 të natës ku do ketë një dobësim gradual. Pastaj nga ora 24:00 deri në orën 03:00 do kemi rrebeshe shiu dhe stuhi, por që era do jetë e përkohshme. Nesër do ketë një përmirësim të ndjeshëm të motit, ndërsa të Premten do ketë një tjetër stuhi që do godasë brigjet e Shqipërisë. E Premtja dhe e Shtuna do ketë reshje në gjithë Ballkanin. Të paktën deri në datën 20 Nëntor do prodhohen stuhi tropikale në Paqësor të cilat do godasin Italinë Jugore e rrjedhimisht edhe Shqipërinë. Të Dielën do ketë një përmirësim të ndjeshëm ndërsa të Hënën sërish reshje”, tha meteorologia.
Zonat që duan më shumë kujdes sipas meteorologes janë Shkodra e Lezha në veri-perëndim, Kruja, Laçi, Tirana dhe Elbasani (Zonat e Shqipërisë së Mesme). Sipas Porjas, përmbytjet në këto zona janë të pashmangshme.
–A rrezikohet lundrimi në zonat bregdetare?
Parashikohet që problematike të jetë kryesisht dita e sotme, nga ora 11:30 deri në orën 16:00, më pas do ketë qetësi. Sot parametri i erës nuk do jetë shumë problematik, por do ketë rrebeshe.
–A do ulen temperaturat?
Nesër do jenë temperaturat e ulëta, mëngjesi pa reshje, por i ftohtë. Të premten do ketë rritje të temperaturave, përplasjet e masave ajrore do sjellin reshje në fundjavë. Problematikë e këtyre ditëve do jenë më shumë reshjet se temperaturat. Nesër s’do ketë reshje dhe do ketë mundësi që të tërhiqen ujërat.
