Një në tre mjete ngel në kontrollin teknik! Shumica probleme me xhamat, pasqyrat, fenerët dhe…
Afërsisht 1 në 3 mjete të testuara përgjatë vitit 2024 nuk e ka kaluar kontrollin Teknik. Sipas DPSHTRR-së, përgjatë vitit të kaluar u testuan rreth 428 mijë mjete, nga të cilat 133 mijë kanë ngelur.
“46% e tyre janë për mangësi vizuale, xham i thyer, pasqyra jo funksionale, 27% sistemi i shkarkimit të gazrave në natyrë, që është dhe fokusi i DPSHTRR”, tha Elton Hoxhaj, drejtor i Drejtorisë së Kontrollit Teknik të Mjeteve, DPSHTRR.
Pjesa tjetër kanë shfaqur probleme me sistemin e drejtimit dhe atë të frenimit.
Sakaq 302 mjete nuk e kanë kaluar kontrollin teknik për shkak të ndërhyrjeve abuzive në kilometrazh, megjithatë ky fenomen sipas DPSHTRR ka ardhur në rënie.
“Numri i mjeteve që kanë pasur ndërhyrje ose parregullsi të tjera ka ardhur në rënie. Kjo vjen edhe nga ndërgjegjësimi që kanë qytetarët”, tha Hoxhaj.
Numri i mjeteve aktive në vend ka shkuar në 959 mijë.
“Krahasuar me 2023 kjo shifër është rritur diku në 10.5%”, tha Hoxhaj.
Vetëm përgjatë vitit 2024 pati 99 mijë e 600 mjete të regjistruara për herë të parë.
