Berat/Finalizohet operacioni antidrogë “Orders”, në pranga 2 të rinj që shpërndanin doza cannabisi në qytet
Policia e Beratit ka finalizuar me sukses një operacion antidrogë të koduar “Orders”, i cili u zhvillua pas një hetimi disamujor me metoda proaktive. Operacioni, i udhëhequr nga Seksioni për Hetimin e Narkotikëve në bashkëpunim me Prokurorinë e Rrethit, çoi në arrestimin e dy shtetasve të dyshuar si shpërndarës të lëndëve narkotike në qytetin e Beratit.
Të arrestuarit janë shtetasit K. N., 21 vjeç dhe Nj. A., 19 vjeç, banues në Berat. Gjatë kontrollit fizik dhe në banesë, policia sekuestroi:
- 330 doza cannabisi
- Një sasi tjetër e kësaj lënde narkotike
- 2 mjete prerëse (thika)
- Fishekë luftarak të mbajtur pa leje
- 7 celularë dhe 1 automjet
Gjatë veprimeve hetimore u procedua në gjendje të lirë edhe A. N., 44 vjeç, babai i 21-vjeçarit, pasi gjatë kontrollit në banesë iu gjetën fishekë pa leje.
Të gjitha materialet e sekuestruara janë marrë në cilësinë e provës materiale, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat për vijimin e hetimeve.
Policia e Beratit vijon punën për goditjen e veprimtarive kriminale në fushën e narkotikëve dhe bën thirrje për bashkëpunim me qytetarët nëpërmjet numrit 112 dhe aplikacionit “Komisariati Dixhital”.
Video Player
