Sarandë/ Sherr turistësh në Ksamil, amerikani konfliktohet me 30-vjeçaren austriake, të panjohura shkaqet
Sarandë– Një sherr turistësh ka ndodhur në plazhin e shumëfrekuentuar të Ksamilit në Sarandë, ku protagonistë kanë qenë dy turistë.
Konflikti ka ndodhur dje (23 korrik) mes një të riu 36-vjeçar, banues në Amerikë dhe një pushueseje banuese në Austri, 30-vjeçare. Shkaqet reale janë ende të panjohura, por Policia vendore bëri me dije se ngjarja ndodhi për motive të dobëta dhe hetimet po i ndjek prokuroria.
“Specialistët për Hetimin e Krimeve në Komisariatin e Policisë Sarandë referuan materiale në Prokurori dhe nisën procedimin penal për shtetasit Y. U., 30 vjeçe, banuese në Austri, pasi ditën e djeshme, në një plazh në Ksamil, është konfliktuar për motive të dobëta me L. H., 36 vjeç, banues në SHBA”, bëri me dije policia vendore për rrethanat paraprake.
Po ashtu janë referuar materiale për hetim edhe ndaj L. B., 48 vjeç, banues në Sarandë, pasi më datë 23 korrik, në lagjen nr. 1 Sarandë, në një objekt në ndërtim, është konstatuar nga punonjësit e Bashkisë “duke kryer punime dhe shkaktuar zhurma, jashtë fashës së orareve të përcaktuara nga Bashkia”.
