Qeveria shqiptare ka miratuar një fond prej 250 mijë eurosh në ndihmë të Kroacisë, pas tërmetit tragjik të djeshëm, ku humbën jetën 7 persona.
“Sapo nënshkrova dekretin e Qeverisë së Shqipërisë për të dhuruar 250 mijë EURO Kroacisë për të ndihmuar në rindërtimin e Petrinjas pas tërmetit shkatërrues! Kroacia është një shembull i rezistencës dhe një model për ne, në transformimin e saj të mahnitshëm në një vend krenar të BE-së”, shkruan kryeministri Rama.
Një vit më parë, Kroacia i dhuroi Shqipërisë 1 milionë euro pas tërmetit tragjik që goditi vendin tonë në 26 nëntor 2019, ku humbën jetë 51 persona dhe u plagosën me qindra të tjerë.
Kroacia u godit dje nga një seri tërmetesh, ku më i fuqishmi ishte 6.4 ballë i shkallës Rihter në orën 12:20. Lëkundjet sizmike shkaktuan shembjen e qindra banesave, me njerëzit që dolën në rrugë të frikësuar.
