Presidenti i Turqisë, Rexhep Tayyip Erdogan zhvilloi një bisedë telefonike me Presidentin rus Vladimir Putin, me temë kryesore luftën midis Izraelit dhe Iranit, si dhe çështje që lidhen me marrëdhëniet dypalëshe dhe zhvillimet rajonale.
Sipas një deklarate nga Drejtoria e Komunikimit e Presidencës Turke, Presidenti Erdogan deklaroi se cikli i dhunës që filloi me sulmet e Izraelit ndaj Iranit rrezikon sigurinë e të gjithë rajonit.
Gjithashtu Erdogan ka theksuar se qëndrimi i paligjshëm i qeverisë Netanyahu përbën një kërcënim të qartë për sistemin ndërkombëtar dhe se rajoni nuk mund t’i rezistojë një lufte të re.
Presidenti turk thuhet se i tha bashkëbiseduesit të tij se vendi i tij ka theksuar iniciativat diplomatike për t’i dhënë fund sulmeve që nga dita e parë, se e vetmja zgjidhje për problemet me Iranin është diplomacia dhe se duhet të ketë një kthim në tryezën e negociatave sa më shpejt të jetë e mundur.
Sipas deklaratës Erdogan theksoi se vëmendja nuk duhet të shpërqendrohet nga gjenocidi në Gaza për shkak të sulmeve të Izraelit ndaj Iranit dhe argumentoi se ekziston një probabilitet i lartë që Izraeli të vazhdojë me fakte të kryera në rajon.
Nga ana e presidencës ruse, u njoftua se Putin i shprehu mirënjohjen e tij Erdoganit për kontributin e Turqisë në negociatat midis Rusisë dhe Ukrainës.
